प्रधानमन्त्री केपी शर्मा ओली थौं गृह जिल्ला झापा झायादीगु दु। निन्हु तक झापा व इलामया थी थी ज्याझ्वलय् ब्वति कायेत वय्कः उखेपाखे झायादीगु खः।

थौं सुथसिया ११ ताः इलय् वय्कःयात चन्द्रगढी विमानस्थलय् नेपाल कम्युनिष्ट पार्टी (एमाले)या कोशी प्रदेश इञ्चार्ज शेरधन राई, मुख्यमन्त्री हिक्मतकुमार कार्की, पार्टीया कोशी प्रदेश अध्यक्ष घनश्याम खतिवडालिसें नेतातय्सं लसकुस यानादिगु खः।

प्रधानमन्त्री ओलीं थौं व कन्हय् झापा व इलाम जिल्लाया थी थी ज्याझ्वलय् ब्वति कयादी धकाः नेकपा एमाले जिल्ला अध्यक्ष प्रेम गिरीं जानकारी बियादिल। वय्कःया कथं प्रधानमन्त्री ओलीं थौं हे बुद्धशान्ति गाउँपालिका–३ य् च्वंगु भागीरथा न्यौपाने बुद्धशान्ति अस्पतालया उलेज्या यायेगु लिसें कन्काई नगरपालिकाय् भूमिहीन दलित, सुकुम्बासी व अव्यवस्थित बसोबास यानाच्वंपिंत जग्गाया धनीपूर्जा वितरण याइगु ज्याझ्वः दु।

असार २९ गते दमक नगरपालिकाय् च्वंगु कृष्ण देगलं उत्तरपूर्वपाखेया मदनडाँगी–ताराबारी–डिपो सतक ब्वया उलेज्या व बिर्तामोडया सिटीसेन्टरय् ग्वसाः ग्वइगु कार्यकर्ता भेलायात संबोधन याये धुंकाः वय्कः येँय् लिहाँझाइगु ज्याझ्वः दु धका गिरीं जानकारी बियादिगु दु।

Categorized in राष्ट्रिय