प्रधानमन्त्री केपी शर्मा ओलीं शनिबाः इलामया माई नगरपालिकाय् निर्मित अस्पतालया उलेज्या यानादीगु दु। माई नगरपालिका–२ दानाबारीइ निर्मित १५ खाताया ‘माई नगर अस्पताल’या उलेज्या यानादीगु खः।

आर्थिक दँ २०७७÷०७८ निसें निर्माण याःगु अस्पताल सङ्घीय सरकारया ग्वाहालिइ १० करौड ७० लाख २४ हजार खर्च जूगु नगर प्रमुख खम्बासिंह लिम्बूं कनादिल। झिगूत्याः रोपनी क्षेत्रफलय् पार्किङलिसेंया निगू तलाया अस्पताल निर्माण जूगु खः। नवनिर्मित अस्पताल भवनपाखें शनिबाःनिसें हे स्वास्थ्य सेवा न्ह्याकूगु खः। २४ घौ हे सेवा प्रवाह यायेगु व्यवस्था जूगु माई नगर स्वास्थ्य शाखा प्रमुख पुष्कर कट्टेलं कनादिल।

अस्पतालपाखें आकस्मिक, आधारभूत प्रयोगशाला, एक्स–रे, भिडियो एक्स–रे, इसिजी, फार्मेसीलिसें सेवा न्ह्याकूगु वय्कलं जानकारी बियादिल। अस्पतालय् स्वास्थ्य बिमा ज्याझ्वः नं लागू याःगु खः।

नगरपालिकाबासीतय् आधारभूत स्वास्थ्य उपचार पालिका दुने उपलब्ध याकेगु व तःधंगु ल्वचं कःपिं ल्वगितय्त मेमेगु सुविधांजाःगु अस्पतालय् रेफर यानाः वनेमाःगु जूगुलिं स्वास्थ्य बिमा ज्याझ्वः नं लागू याःगु नगर प्रमुख लिम्बूं कनादिल।

Categorized in राष्ट्रिय