प्रधानमन्त्री केपी शर्मा ओलीं कनकाई नगरपालिकाया भूमिहीन दलित, सुकुमबासी व अव्यवस्थित बसोबास यानाच्वंपिंत जग्गाधनी पुर्जा इना ब्यूगु दु।

भूमि समस्या समाधान आयोग, जिल्ला समितिं ग्वसाः ग्वःगु थौंया ज्याझ्वलय् उगु पालिकाया २०० म्हसित वय्कलं जग्गाधनी पुर्जा इना ब्यूगु खः।प्रधानमन्त्री ओलीं भूमिहीन दलित, सुकुमबासी व अव्यवस्थित बसोबास यानाच्वंपिंत जग्गाधनी पूर्जा दूगु लसताया खँ जूगु न्ह्यथनादिसें आःया सरकारं मुलुकय् राजनीतिक स्थायित्व कायम यानाः जनताया समस्या ज्यंकेगुलिइ ध्यान केन्द्रित यानाच्वना धकाः धयादिल।

वय्कलं भूमिसम्बन्धी फुक्क समस्या ज्यंकेत याकनं भूमि विधेयक पारित जुइगु जानकारी बियादिल। प्रधानमन्त्री ओलीं भूमिया फयांफक्व उपयोग यायेगु, विशेष यानाः व्यावसायिक खेती यानाः आर्थिक समृद्धिया लँपुइ न्ह्याःवनेत आवश्यक जूगु धयादिल। प्रधानमन्त्रीया निजी सचिवालयया कथं देय् विकासया गतिइ न्ह्याःवंगुलिं निराश मजुइत फुक्क नेपाःया जनता तय्त आह्वान यानाः मुलुकं गणतान्त्रिक शासन व्यवस्था नालेधुंकाः शिक्षा व स्वास्थ्यलिसें ख्यलय् यक्व ह्यूपाः वःगु धयादिल।

बिस्कं प्रसङ्गय् प्रधानमन्त्री ओलीं नेपाली कांग्रेसलिसे जूगु सहमति कथं उगु दलया सभापति नापं लोकतान्त्रिक आन्दोलनया थः सहयात्री शेरबहादुर देउवायात आइक्वं सत्ता लःल्हायेगु धकाः धयादिल। “वइगु निर्वाचनतक नेपाली कांग्रेसलिसेया सहकार्य जुयाच्वनी।

जिं पासापिंत ढुक्क जुयाः न्ह्याःवनेत इनाप यानाच्वना”, वय्कलं धयादिल। उगु झ्वलय् आयोगया केन्द्रीय अध्यक्ष हरि रिजालं पूर्वंनिसें पश्चिम महाकालीतकया भूमिहीन दलित, सुकुमबासी व अव्यवस्थित बसोबास यानाच्वंपिंत छसिंलाक जग्गाधनी पुर्जा इनाबिइ धकाः धयादिल।

Categorized in राष्ट्रिय