त्रिवि शिक्षण अस्पतालं स्वास्थ्य सेवायात अझं प्रभावकारी व गुणस्तरीय दयेकेत न्हूगु सुविधां जाःगु सेवा न्ह्याकूगु दु।

स्वास्थ्य लिसें जनसङ्ख्यामन्त्री प्रदीप पौडेलं म्हिगः अस्पतालय् झिंन्यागू शय्यालिसेंया इमर्जेन्सी कक्ष ‘ग्रीन एरिया वार्ड’ व आधुनिक प्रविधिलिसेंया ‘थ्री टेस्ला एमआरआई’ सेवाया उलेज्या यानादिल। उगु इलय् वय्कलं शिक्षण अस्पतालया थ्व कुतलं स्वास्थ्य ख्यलय् प्रभावाकारिताया निंतिं थप योगदान जुइगु भलसा काःगु दु।

मन्त्री पौडेलं धयादिल, “थपेयानागु सेवां यक्वः नागरिकयात दंक्व व अःपुक सेवा कायेत अःपुइगु जुइ। आ वइगु दिनय् सेवा तब्याकाः अस्पतालयात आधुनिकीकरण यायेगु कुतलय् मन्त्रालयया ग्वाहालि दइगु जुइ।”

अस्पतालया निर्देशक प्राडा सुवास आचार्यं मन्त्रालयया ग्वाहालिइ आधुनिक एमआरआई मेसिन वःगु व आः बिरामीतय्सं थिकेक ध्यबा पुलाः मेथाय् वने म्वाःलीगु धयादिल।

बिरामीया ल्याः अप्वो जुइगु जुसां इमर्जेन्सी कक्षय् शय्या मगानाः छगू हे ‘बेड’य् निम्ह तक भर्ना यायेमाःगु अवस्था दगुलि आः उगु समस्या ज्यंकेया निंतिं नं योगदान दइगु वय्कलं धयादिल।

Categorized in राष्ट्रिय