उत्तर कोरियाया नेता किम जोङ उनं रुसी विदेशमन्त्री सर्गेई लाभ्रोभलिसेया वार्ताय् युक्रेनय् जुयाच्वंगु युद्धय् मस्कोयात पूर्ण समर्थनया प्रस्ताव तःगु दु।

रुसं बिएभ विरुद्ध आक्रमण यानाच्वंगु इलय् निगू देय् दथुइ सैन्य व राजनीतिक स्वापू प्रगाढ जुयाच्वंगु इलय् मस्कोया शीर्ष अधिकारीतय्गु उच्चस्तरीय भ्रमणया श्रृंखलाय् लाभ्रोभया उत्तर कोरिया भ्रमण लिपांगु भ्रमण खः।

प्योङयाङं युक्रेनी सेनायात लिउने लाकेत रुसया कुस्र्क क्षेत्रय् द्वलंद्वः सैनिक छ्वःगु दुसा रुसी सेनायात तोप व क्षेप्यास्त्र नं उपलब्ध याकूगु दु। केसीएनएया आधिकारिक समाचार एजेन्सीं शनिवाः किम व लाभ्रोभया नापलायेगु ज्या जूगु खः। रुसी विदेश मन्त्रालयं टेलिग्रामय् निम्हेस्यां ल्हाः मिले यानाः घय् पुया च्वंगु भिडियो पोष्ट यासें देय्या पूर्वी तटय् च्वंगु वोन्सनय् वार्ता जूगु धाःगु दु।

थुगु महिना न्ह्यः वोनसानय् छगू तःधंगु रिसोर्ट चाःगु खः।किमं लाभ्रोभयात उत्तर कोरियां ‘युक्रेनया संकटया मूल कारणयात ज्यंकेगु निंतिं रुसी नेतृत्वं याःगु फुक्क उपाययात बिना शर्त ग्वाहालि व प्रोत्साहन यायेत तयार दु’ धकाः धयादीगु दु।लाभ्रोभं वोन्सनया भ्रमण यासें थुकियात “बांलाःगु पर्यटकीय आकर्षणया केन्द्र” धकाः प्रशंसा यासें वय्कलं धयादी, “स्थानीय नागरिकतय् दथुइ जक मखु, रुसीतय् दथुइ नं थुकियात लोकंह्वाइगु आशा यानाच्वना।”

Categorized in अन्तर्राष्ट्रिय