स्वास्थ्य लिसें जनसङ्ख्यामन्त्री प्रदीप पौडेलं क्यान्सर ल्वय्या उपचारय् छ्यलीगु मदयेकं मगाःगु वासः सितिकं बिइगु धयादीगु दु।

नेपालय् वासः मदूगुलिं उपचारया निंतिं विदेश वनेमाःगु बाध्यता चिइकेत अन्तर्राष्ट्रिय च्यारिटी डाइरेक्ट रिलिफं स्वीइन्हय्ताजि वासः ग्वाहालि यायेगु प्रतिबद्धता प्वंकूगु कथं न्हापांगु चरणया वासः नेपाः थ्यंकेहःगु वय्कलं धयादिल। थ्व स्वया न्ह्यः मन्त्री पौडेलं थुजाःगु वासः कयाः सरकारी अस्पतालय् सितिकं इनेगु निर्णय न्यंकादीगु खः।

डाइरेक्ट रिलिफं वन हर्ट वल्र्डवाइड संस्थापाखें नेपाः सरकारयात छ्वयाहःगु ग्वाहालि लःल्हायेगु निंतिं ग्वसाः ग्वंगु ज्याझ्वलय् मन्त्री पौडेलं वासः मदयाः विदेश वनाः यक्वः ध्यबा फुकेमाला च्वंगु बाध्यता चिइकेत ताः ई कुतः लिपा ताःलाःगु मन्त्री पौडेलया सचिवालयं धाःगु दु।“क्यान्सरया वासः थिकेगु जुइगु जुयाः विपन्न नागरिकतय्त समस्या दु”, मन्त्री पौडेलं धयादिल, “राज्यया लगानी मजुइ कथं हे यक्वः नागरिकतय्त राहत बिइगु कुतः यानागु खः।”

आः स्वीन्हय्ताजि वासः कथं वइगु जुसां मेमेगु माः कथंया वासः नापं ग्वाहालि कायेगु कुतः यायेगु मन्त्री पौडेलं धयादिल। दुरुपा क्यान्सर, प्लाक सोरियासिस, अल्जाइमर नापंया स्वास्थ्य समस्याय् छ्यलीगु थुपिं वासः व स्वास्थ्य सामग्रीत भरतपुरया बीपी कोइराला मेमोरियल क्यान्सर अस्पताल, ख्वपया भक्तपुर क्यान्सर अस्पताल, बाँकेया सुशील कोइराला प्रखर क्यान्सर अस्पताल व येँया वीर अस्पतालयात लःल्हानागु मन्त्रालयया प्रवक्ता डा प्रकाश बुढाथोकीं धयादिल।

Categorized in राष्ट्रिय