नेपाःया न्हापांगु निजी टेलिभिजन च्यानल इमेज च्यानलया व्यवस्थापनय् हिउपाः वःगु दु । न्हूगु व्यवस्थापनया कार्यकारी अध्यक्ष पदय् युवा व सशक्त संचार व्यवसायीलिसें कामना प्रकाशन गृहया सीईओ दिरेकलाल श्रेष्ठयात ल्यःगु दु।

अथे हे न्हूगु व्यवस्थापनय् मेम्ह संचार व्यवसायी चेङ अग्रवालयात प्रबन्ध निर्देशक नियुक्त याःगु दु। सोमवाः लाजिम्पाटय् च्वंगु इमेज च्यानलया ज्याकुथिइ जूगु छगू विशेष ज्याझ्वः दथुइ इमेज ग्रुप अफ कम्पनीया नायः आरके मानन्धरं न्हूगु व्यवस्थापनयात जिम्मेवारी लःल्हाःगु खः।वंगु २७ दँनिसें मानन्धरया अध्यक्षताय् संचालन जुयाच्वंगु इमेज च्यानल टेलिभिजन २०८२ साल १ श्रावणनिसें न्हूगु व्यवस्थापनय् संचालन जुइगु जूगु दु।

आः इमेज च्यानल टेलिभिजनया नापनापं इमेज एफएम ९७.९ व इमेज खबर डटकम नं न्हूगु व्यवस्थापनय् संचालन जुइगु जूगु दु। इमेज च्यानल टेलिभिजन नीस्वंगु इलंनिसें ज्या याना वयाच्वंम्ह जगदीश खरेलयात नं न्हूगु व्यवस्थापनं समाचार प्रमुखया जिम्मेवारी ब्यूगु दु।

उगु ज्याझ्वलय् नायः मानन्धरं युवा संचार व्यवसायीपिन्त जिम्मेवारी लःल्हाय् खनां थः लय्ताःगु खँ कनादिल।उगु लसताय् नवनियुक्त कार्यकारी अध्यक्ष दिरेकलाल श्रेष्ठं इमेज च्यानल टेलिभिजनया छवियात ध्यानय् तयाः प्रभावकारी रुपं कम्पनीयात न्ह्यःने यंकेगु प्रतिबद्धता प्वंकादीगु खः।

थःम्हं कामना प्रकाशनपाखें नैतिक पत्रकारिता सयेकागु धासें अध्यक्ष श्रेष्ठं अमेरिका व नेपाःया प्रिन्ट मिडियाय् निगू दशक स्वया अप्पो अनुभव व इमेजया स्वंगू दशकया गौरवपूर्ण इतिहासयात स्वानाः कम्पनीयात न्हूगु उचाइलय् थ्यंकेगु संकल्प प्वंकादिल।

युवा संचार व्यवसायी श्रेष्ठयात आः नेपाल समाचारपत्र, इमेज टेलिभिजन व इमेज एफएम नीस्वनाः पत्रपत्रिका, टेलिभिजन व रेडियोयात छक्वलं अग्रसर यायेगु भाला बिउगु दु। न्हूगु व्यवस्थापनं प्यंगू हे माध्यम टेलिभिजन, रेडियो, अनलाइन व प्रिन्टपाखें थःत अझ सशक्त व प्रभावकारी रुपं न्ह्यब्वयेगु प्रतिबद्धता नं प्वंकूगु दु।

Categorized in राष्ट्रिय