अमेरिकाया राष्ट्रपति डोनाल्ड ट्रम्पं ची चीधंगु अफ्रिकी व क्यारिबियन मुलुकपाखें आयात जुइगु सामानय् १० प्रतिशत स्वयां अप्वो कर लगे यायेगु धयादीगु दु। दक्वं देसय् छगू हे दर लागु यायेगु धाःम्ह ट्रम्पं थ्व दर १० प्रतिशतसिबें भचा च्वय् जूगु एसोसिएटेड प्रेसया जानकारी ब्यूगु दु।

वय्कलं म्होतिं नं १०० गू देय्या सामानय् थ्व कर लगे यायेगु योजना दूगु धयादीगु दु।अमेरिकाया वाणिज्य मन्त्री हावर्ड लुटनिकं थुगु शुल्कं अप्वो लिच्वः लाइगु सम्भावना दूगु देय्त अफ्रिका व क्यारिबियन जुइगु धयादीगु दु।

थ्व महिना न्ह्यः राष्ट्रपति ट्रम्पं थ्यंमथ्यं निगू दर्जन देय् व युरोपेली संघयात पौ छ्वयाः अगस्ट १ निसें लागू जुइगु न्हूगु शुल्कया जानकारी ब्यूगु खः।

उगु इलय् शुल्क घोषणा याःगुलिं अमेरिकाया वित्तीय बजारय् उथलपुथल जूगुलिं ट्रम्पं ९० न्हुया वार्ता अवधिया घोषणा याःगु खः। उगु ई जुलाइ ९ कुन्हु क्वचाइ।

Categorized in अन्तर्राष्ट्रिय