‘स्वतन्त्र’या न्ह्यलुवाः जः व म्हगस
सुरजवीर बज्राचार्य | गुंलाथ्व पारु ११४५, सावन ९ शुक्रवाः
कला ख्यलय् सदां नं जः थें त्वयाच्वनी “स्वतन्त्र’
सकसिया नुगलय् स्वां थें ह्वयाच्वनी “स्वतन्त्र’
पंगः, पःखालं पंसां सर्गः थीगु मनसुवाः “स्वतन्त्र’
हःपा थें नुगः नुगलय् सदां लुयाच्वनी “स्वतन्त्र’
वइपिं सकलें छन्हु वनेमानी। समाजया निंतिं म्वाःपिं धाःसा वनां नं झीगु समाजय् हःपा जुयाः, जः जुयाः ल्यनाच्वनी, निभाः जुयाः त्वयाच्वनी, तिबः जुयाः थ्वयाच्वनी । नस्वाः जुयाः ह्वयाच्वनी ।
‘स्वतन्त्र’ या जीवन नं अनन्त खः । स्वतन्त्रं थःगु नुगःया सः कला, संचारया फ्यानाब्यूगु हुनिं स्वतन्त्रया जीवन बिनावंसां नं ल्यनाच्वनीगु जीवन जूगु खः ।
कलाकार, संकिपाकःमि, संगीतकःमि स्वतन्त्रं संसार क्रियशन्स् नेपालया क्रियटिभ डाइरेक्टर जुयाः कर्म यानादिल । अले ब्वयादिल समाजयात च्वन्ह्याकीगु म्हगस व आज्जु । The Biggest & Longest Award in Nepalbhasa Music, Video & Film Industry थ्व छगू अजाःगु तातुना खः गुकिं स्वतन्त्र, संसार ग्रुपनाप नेवाः संगीत व संकिपा ख्यःया प्रवद्र्धन यासें सकल कलाकार, सर्जक, प्राविधिकपिनिगु निंतिं छगू उत्साह थनाब्यूगु खः SANSAR NATIONAL STAR MUSIC VIDEO AWARDS ज्याझ्वलं । निदँय् छकः यानाः वयाच्वंगु थुगु अवार्ड वंगु जेष्ठया ३ गते स्वक्वःगु खुसी पूवंगु खः । न्हापांगु ज्याझ्वः यायेत हाथ्या यक्वः दइसा निरन्तर न्ह्याकेगुलिइ हाथ्या अझं अप्वइ । उकीसनं स्वतन्त्रयात थःगु हे शरीरया अशक्ततां हाथ्या तनाब्यूगु नं झीत सदां लुमनाच्वनिसा उगु हाथ्याः पुलाः ज्याझ्वः ताःलाकेगु निंतिं माःगु आत्मविश्वास बीफुगु बःलाःगु मन व धिसिलाःगु नेतृत्व ‘स्वतन्त्र’ खः । सशक्तम्ह स्वतन्त्रयात वया शरीरं क्यनाच्वंगु अशक्ततां पनेमफु ।
समाजया निंतिं कला, कलाकारिता, संचार, कासा, स्वास्थ्य, समाजसेवाया माध्यमं थःत देछाःम्ह स्वतन्त्रं संसार क्रियशन्स् नेपाल, स्वतन्त्र संसार प्रिन्टिङ सर्भिसेज्, संसार फाउण्डेशन नेपाल, संसार अनलाईन टेलिभिजन, संसार फिटनेश सेन्टर, संसार अनलाईन न्यूज डटकम, संसार संगीतालय थेंजाःगु थीथी विधाय् व क्षेत्रय् सक्रिय रुपं धिसिधायेक न्ह्यज्यानाच्वंगु नं लुमंकाच्वना । थुलिमछि विधाय् संस्थागत रुप धिसिधायेक न्ह्यज्याकादीम्ह ‘स्वतन्त्र’ समाजया निंतिं दसू जुयाः धस्वात । थुलिमछि संस्थाया माध्यमं थीथी ज्याझ्वः न्ह्याकादीम्ह स्वतन्त्रया जीवनय् ‘थाकु’ धइगु खँग्वः मलू । अझ न्यासे वनेमफुगु शरीरया अवस्थाय् थःगु मुक्कं ई थःगु संस्था व सृजनायात बीफुगु खँ तयादीम्ह स्वतन्त्रया थुगु हे भावं स्वतन्त्रयात मेपिं स्वयां पाकाबिल ।
२०३९ साल माघया १४ गते यल महानगरपालिका २१ वडा, ख्वनाय् अबु तेजबहादुर महर्जन व मां कान्छी महर्जनया कोखं जन्म जुयादीम्ह स्वतन्त्रकुमार महर्जनं थःत स्वतन्त्र ‘संसार’ महर्जन कथं म्हसीकादिल । थुगु कला ख्यलय् समर्पित व सशक्त जीवन म्वायेत तिबः वय्कःया जहान प्रेमशोभा महर्जन (प्रेमहा) नं खः । थुकी संसार्स पुचःनापं समाजया हःपाः, ग्वाहालि व तिबः नं लुइ समाजया निंतिं स्वतन्त्रया म्हगसया मू थूपिं ।
स्कुल जीवनंनिसें हे थःगु प्रतिभा अभिनय, नृत्य, कासा ख्यलय् थःत न्ह्यब्वयाः मन त्याकेतः ताःलाःम्ह स्वतन्त्रं उबलय् हे आपालं सिरपा नं त्याकादिलसा वय्कलं सूर्यमुखी युवा क्लब नीस्वनालि संस्थापक नायः जुयाः विविध खेलकूद व सांस्कृतिक ज्याझ्वः नं ग्वसाः ग्वयादिल । वि.सं. २०६० सालय् लुँझ्याः कला कुञ्ज व वय्कः स्वतन्त्र हे संस्थापक नायःकथं न्ह्यज्याःगु सँझ्याः कला कुञ्जया ग्वसालय् मेची निसें महाकाली तकःया तिसावसः ब्वज्या–२०६० तःजिक ग्वसाः ग्वयादिल । थुकी वय्कलं सह–संयोजकया भाला पूवंकादीगु खःसा थुगु हे संस्थापाखें २०६१÷६२ सालय् विविध साँस्कृतिक ज्याझ्वः ग्वसाः ग्वयाः श्रष्टा साधकपिंत हना नापं सांस्कृतिक ज्याझ्वः यानादिल । थुगु संस्थाया माध्यमं आपालं न्हू प्रतिभापिंत कला गुण स्यनेगु नापं उगु गुण ब्वयेगु नितिं ज्याझ्वःया ग्वसाः ग्वयेगु ज्या नं आपालं जुल ।
कला ख्यलय् मन क्वसाःम्ह स्वतन्त्रया निंतिं प्रतिभा न्ह्यब्वयेतः दबू अःपुल लूगु अनुभव नं दुगु खःसा ख्यः तब्याः यायेगु मनसुवाःलिसें न्ह्यज्याःगु पलाखय् संघर्षया चःति नं उत्तिकं लू । ‘संकिपातय् हिरो जुइगु मती तयाः बियागु आपालं अडिशन व संघर्षया बाखं स्वतन्त्रं कनादीगु नं दु । २०६० सालय् नेपाली चलचित्र ख्यलय् पलाः न्ह्याकाःलि २५ स्वयां अप्वः म्युजिक भिडियो, झिगूलिं मयाक्क टेलिफिल्म व संकिपातय् कला न्ह्यब्वयादिल ।
खस नेपाली भाय्या कला ख्यलय् स्थापित जुइत न्ह्यज्यानाच्वंगु पलाः थःगु मांभासं संकिपा दयेकेगुपाखें न्ह्यात, मांभासं हे संकिपा दयेकेगु तातुना तयाः । थुकी स्वतन्त्रया संकिपातय् ‘हिरो’ जुइगु मनसुवाः दुथ्याःगु खः । थुगु मनसुवाः पूवंकेतः वि.सं. २०६३÷६४ सालय् ११ म्ह दुजः दुथ्याःगु एम्स् मुभिज प्रोडक्सन स्वनादिल अले पिदन नेपालभाषाया संकिपा ग्वाज्यःचा, ए जि यम्ह, निफ्वः स्वां, हसना, पियाच्वना, गुगु संकिपातय् निर्माणया भाला जक मखःसे निर्देशनया भाला पूवंकूगु नं लुमंकेबहःगु गुण खः । थ्व जिगु नुगः, जिपिं बदमास मखु, माया, मिखा दुम्ह कां, इहिपा स्वतन्त्रया अभिनय दुथ्याःगु संकिपा खः । थुकथं नेपालभाषा संकिपा ख्यलय् लोकं ययेकूम्ह ‘हिरो’ कथं स्वतन्त्र स्थापित जुल ।
कोरोनां जनजीवनय् भय ब्वलंकाच्वंगु इलय् स्वतन्त्रया हे नेतृत्वय् विश्वव्यापी गायन रियालिटी शोया अनलाइन ज्याझ्वः नं जुल । लिपा सकलें मुनेफुगु परिस्थितिइ थुगु
कासाया ग्राण्ड फिनाले वि.सं. २०७८ भाद्र २६ गते शनिवाः राष्ट्रिय सभागृहया हलय् जूगु जुल ।
कला ख्यलय् मनक्वसाःपिनिगु निंतिं हःपा ग्वसाः कथं थीथी ज्याझ्वः यानाः वयाच्वंगु स्वतन्त्रया नेतृत्वया संसार्स पुचलं संसार संगीतालय न्ह्याकल । संगीतया लसतां जाःगु माहौल अनलाइनया माध्यमं सकभनं ह्वल ।
थुकथं न्ह्यज्याःम्ह स्वतन्त्र थः हे नं छम्ह म्ये हालामि कथं थीथी सृजना न्ह्यब्वयेगु ज्या नं वय्कलं यानादिल, नेपालभाषा व खस नेपाली भाय्या म्ये हालादिल । आपालं प्रतिभां जाःम्ह स्वतन्त्र संसार महर्जनं २०५५ सालय् श्री रुद्रायणी युवा क्लवया ग्वसालय् जूगु वडा स्तरीय फुटवल कासाय् न्हाप सिरपा त्याकादिल । वि.सं. २०७३ पौष १६ गते ज्यापु महागुथि केन्द्रिय समितिपाखें नेवाः जाति, भाषा, संस्कृति ख्यलय् सक्रिय जुयाः थीथी ज्या यानादीगुलिं हंगु जुलसा वि.सं. २०७५ श्रावण २६ गते जूगु NATIONAL BOX OFFICE MUSIC VIDEO AWARD 2018 य् हनापौ देछाःगु जुल । वि.सं. २०७५ सालया आश्विन २८ गते वृहत समुदाय नेपालपाखें संकिपा ख्यःया बहुमुखी प्रतिभां जाःम्ह कलाकार कथं Versatile Artist उपमा देछाःसें कदर–पत्र लःल्हाःगु खः । वि.सं. २०७५ मंसीर २१ गते सुनाकोठी बुदोकैदो क्लबपाखें नृत्य/भिडियो निर्देशनय् योगदान याःगु न्ह्यथंसें हनापौ देछाःगु जुल । वि.सं. २०७६ माघ १६ गते न्हापांगु नेपालभाषा स्टार म्युजिक भिडियो अवार्डस्–११४० ज्याझ्वः सुथांलाक न्ह्याकाः समाजय् उत्साह ब्वलंकूगु धासें आर. वि. फिल्म प्रा.लि., मध्यपुर थिमि, ख्वपपाखें हना–पौ देछाःगु जुलसा वि. सं. २०७७ चैत्र २८ गते ब्लक बस्टर नेपाली फिल्म अवार्ड–२०७७ पाखें “कला संस्कृतिको विकास तथा श्रीबृद्धि गर्नुभएको” धकाः उल्लेख यासें सम्मान–पत्र लःल्हाःगु जुल । थुकथं हे वि.सं. २०७८ सालय् ललितपुर महानगरपालिका वडा नं. २१ पाखें खोकना म्याराथोन जूगु ज्याझ्वलय् कदर–पत्र देछाःगु खःसा वि.सं. २०७८ सालय् खोकना एभेटोरियम स्पार्टेस् टुरिजमपाखें प्रशंसा–पत्र लःल्हाःगु खः ।
वि.सं. २०७९ सं लूनिभा बाल सरोकार समूहया रजत जयन्तीया लसताय् कदर–पत्र, वि.सं. २०८१ सालय् काठमाण्डौं महानगरपालिकापाखें सुभाय्–पौ, लहना मिडियापाखें वि.सं. २०८१ श्रावण ११ सुभाय्–पौ, लहना मिडियापाखें हे लहना शर्मिष्ठा सुर–सम्मान ११४१, दाफा मुना खलः किपूपाखें गुरु पुन्हि २०८१ या लसताय् कला संस्कृतिया संरक्षण, प्रचार प्रसार याःगु उल्लेख यासें सुभाय्–पौ प्राप्त । पवन जोशी सन्ध्या – ११४४ ज्याझ्वलय् म्ये न्ह्यब्वःगु नापं ज्याझ्वःयात जूगु ग्वाहालि न्ह्यथँसें सुभाय्–पौ, वि.सं. २०८१ कार्तिक १ गते Family Crew पाखें हना–पौ देछाःगु जुलसा ज्याझ्वलय् उगु हे गुण व योगदान लुमंकाः मतिनां देछाःगु मतिनाया चिं नं स्वतन्त्रया जीवन झलमल्ल धाः ।
थुकथं म्वाःम्ह स्वतन्त्र सदां म्वानाच्वनी कला व कला ख्यलय् यानादीगु कर्मया माध्यमं ।
थ्व हे झ्वलय् गुंलाथ्व पारु शुक्रवाः (श्रावण ९ गते) संसार क्रियशन्स् नेपाल, संसार्स अनलाइन, संसार संगीतालय जानाः किर्तिपुर सिनेप्लेक्सय् बिचाः हायेका ज्याझ्वः यायेत्यंगु दुसा ८ गते यल महानगरपालिका २१ वडापाखें स्वतन्त्र संसार महर्जनया लुमन्तिइ ज्याझ्वः ग्वसाः ग्वःगु दु । झी सकलें मुने । स्वतन्त्रया कर्म निरन्तर यायेगु व वय्कःया म्हगसया पूवंकेगु ग्वसाः ग्वय् । थुकथं पूवंगु प्रत्येक ज्याय् “स्वतन्त्र” लुयाच्वनी....सदां......
