भारतया राजधानी न्हूगु दिल्लीया अन्तरराष्ट्रिय विमानस्थलं भिजिट भिसाय् कुवेट वनेत्यंपिं पीन्हय्म्ह नेपाली मिसापिंत नेपाः लित छ्वयाहःगु दु।

दिल्लीया विमानस्थलं एनओसी मदय्कं कुवेत वनेत्यंपिं मिसापिंत दिल्लीया नेपाली दूतावासलिसेया समन्वययाना नियन्त्रणय् कयाः स्थलमार्ग जुया बिहीबाः बहनि रूपन्देही हःगु दु। दिल्लीया नेपाली दूतावासया प्रहरी वरिष्ठ उपरीक्षक प्रकाश मल्ललिसें दूतावासया कर्मचारीया पुचलं मिसापिंत सुनौली नाका जुकाः रूपन्देही थ्यंकेहयाः प्रशासनया जिम्माय् ब्यूगु रूपन्देहीया प्रमुख जिल्ला अधिकारी वासुदेव घिमिरें धयादिल।

प्रजिअ घिमिरेया कथं मिसापिंत आः प्रहरीं येँय् हयाच्वंगु दु। अथे हे गृहमन्त्री रमेश लेखकं ज्वनातःपिं मिसातय्गु विषय कडा अनुसन्धान यायेत प्रहरीयात निर्देशन बियादीगु दु। उगु विषय गृहमन्त्री लेखकं मानव बेचबिखन व्यूरोयात माःगु छानबिन यानाः दोषीयात कारबाहीया दुने हयेत निर्देशन बियादीगु गृह मन्त्रालयं धाःगु दु।

मन्त्री लेखकं वैदेशिक लजगाःखय् अवैध कथं वनेगु विषयया दुग्यंकं अनुसन्धान यायेत निर्देशन बियादीगु खः।

Categorized in अपराध