स्वतन्त्र जीवन हनावन छं स्वतन्त्र
बिराजकाजी राजोपाध्याय | गुंलाथ्व पंचमी ११४५, सावन १३ मंगलवाः
स्वतन्त्र, नामं जक मखु, स्वभाव नं स्वतन्त्र हे छंगु। धात्थें हे स्वतन्त्र जीवन हनावन छं। हनेत ला छं उमेरया ल्याखं तसकं चीहाकःगु जीवन जक म्वानावन। तर व चीहाकःगु जीवनय् छं जीवनया स्वतन्त्रता यक्वसित स्यनाथकल। क्यान्सर थज्याःगु ल्वचं छन्त तुतिं चुइके मबिल खः तर, क्यान्सरयात हे च्यालेन्ज यानाः छं थःगु चीहाकःगु जीवन धिसिमिसि धायेकूगु दु।
स्वतन्त्रं छु जक मयाः। शारिरीक रुपं छुं धायेम्वाःपिं मनूतय् छुं नं ज्या यायेत अनेक त्वहः दयाच्वनी। जितः छ्यं स्यात, जितः प्वाः स्यात धयां तकं ज्या छखे छखे तयाच्वनी। तर, स्वतन्त्रया खँ ल्हायेगु खःसा व न्यासि वनेमफु। छथासं मेथासय् वनेत याउँक वनेमदु। तर ज्या यायेगु सवालय् स्वतन्त्रं थथे मफु अथे मफु छुं हे त्वहः दइमखु। दुसा ज्याझ्वः झःझः धायेक क्वचायेकूगु रिजल्ट जक दइ।
हलिमय् दकलय् तःधंगु अवार्ड ज्याझ्वःया रुपय् वल्र्ड रेकर्ड दयेकेगु आँट स्वतन्त्रयाके हे दु। लकडाउनया इलय् स्वतन्त्रं ग्वसाः ग्वःगु संसार अनलाइन सिंगिंग स्टार्स नं उलि हे सफलतापूर्वक क्वचाल । स्वतन्त्रया संयोजनय्, स्वतन्त्रया नेतृत्व संचार क्षेत्रय् संसार अनलाइन टिभिमार्फत स्थानीय गतिविधिया रिपोर्टिङ नं जुया हे च्वन। संसार संगीतालयमार्फत सांगितिक ज्याझ्वः निरन्तर जुया हे च्वनी। गुलि जक ज्याझ्वः, गतिविधिया खँ ल्हाये स्वतन्त्रं यानावंगु। स्वतन्त्रया थुकथंया सक्रिय व ऊर्जावान जीवनं हे दक्वसित हःपाः बिया हे च्वन, बिया हे च्वनीतिनि।
छम्ह कलाकारया ल्याखं स्वतन्त्रयात म्हस्यूगु ला यक्व हे दत। स्वतन्त्रयात दकलय् न्हापां गन नापलात धकाः न्यन धाःसा जितः लुमं ला मजू। तर, स्वतन्त्रं अभिनय याःगु संकिपा ‘अय् जि यःम्ह’ लय् जिं च्वयागु ‘सत्ते सत्ते सिनावने जि’ धाःगु म्ये छपु दुथ्याः वन। व हे संकिपा अय् जि यःम्हया म्येया डिभिडि एलबम सार्वजनिक ज्याझ्वलय् म्ये च्वमिया ल्याखं जितः नं सःतल। जि व ज्याझ्वलय् वनाः मतिनाया चिं नं कयागु खः। जितः गन तक ताः स्वतन्त्रयात नापलाःगु व हे दिनय् जुइमाः। लिपा बांलाक खँल्हाबल्हा गबले जुल धायेमफुत।
स्वतन्त्रयात ट्यूमर जुइधुंकाः न्हापां ला अपरेशन नं यात। वयां लिपा नेपालभाषा संकिपा समाजं नेवाः फिल्म महोत्सवया घोषणा ज्याझ्वः याःगु दिनय् स्वतन्त्रलिसे खँ ल्हानागु जिगु मिखाय् थौं नं झलझल लुयावः। मेरुदण्डय् ट्यूमर जुइधुंकाः न्यासि वने मफयाच्वंम्ह स्वतन्त्र व दिनय् नापलाःबलय् स्वतन्त्र बुलुहुँ बुलुहुँ न्यासि वनाच्वंगु खना। जुइ मफयाच्वंम्ह स्वतन्त्र न्यासि वनाच्वंगु खंबलय् नुगः लसतां जाल। जिं व लसता स्वतन्त्रया न्ह्यःने हे वनाः प्वंका। ‘थौं स्वतन्त्र न्यासि वनाच्वंगु खनां तसकं खुसी लगेजुल। मेपिं थ्व ल्वचय् थुलि याकनं दनेफैमखु। स्वतन्त्रया आत्मबल धात्थें बल्लाः खनी’ जिं धया। स्वतन्त्रया लिसः थौंतकं लुमं जितः। ‘थज्याःगु ल्वचं जितः आपाः लासाय् तयातये फइला दाई? छुं टाइम आराम जक यानागु का ।’ स्वतन्त्रया व लिसः गुलि जोशं जाः।
थथे हे दथुइ उगुं थुगुं ज्याझ्वलय् स्वतन्त्रयात नाप लानाच्वनी। स्वतन्त्रया ऊर्जां हे जितः स्वतन्त्रलिसे सतिका नं यंकल। जुजुं स्वतन्त्रलिसे भचा अप्वः सतिनागु धयागु स्वतन्त्रं स्टार म्यूजिक भिडियो अवार्ड्सया आयोजना यासांनिसें हे खः। उगु इलय् स्वतन्त्रया ट्यूमर लिथुयाः हाकनं जुइ मफूगु अवस्थाय् थ्यनेधुंकल। थः न्यासि जुइमफूगु अवस्थाय् थ्यंकाः नं हलिमय् दकलय् तःधंगु अवार्ड ज्याझ्वः यानाः वल्र्ड रेकर्ड तयेगु योजनाय् न्ह्याःवंम्ह स्वतन्त्रं उगु ज्याझ्वःया उद्घोषण बांलाक याइम्ह उ्दघोषक कथं जितः लुमंकल। ज्याझ्वः उद्घोषण यानाबी माल धाल, जिं ज्यू धया । ज्याझ्वः यानाः, स्वतन्त्र लय्ताः। अवार्डया निगूगु संस्करण थ्यंबलय् स्वतन्त्रं जितः अवार्डया ब्रान्ड एम्बेस्डर हे धायेगु यात । न्ह्याथाय् न्ह्यागु ज्याझ्वलय् नं न्ववाइबलय् अवार्डया खँ वल कि ‘बिराज दाइ ला स्टार म्यूजिक भिडियो अवार्डया ब्रान्ड एम्बेसडर’ धकाः धा हे धाइ।
स्वक्वःगु अवार्ड थ्यंबलय् अथें नं जिगु नुगः त्याकेधुंकूम्ह स्वतन्त्रं जितः थ्व कथंया थासय् थ्यंकाबिल, गुकियात जिं शब्दं व्यक्त याये हे मफु। अवार्डय् ब्वति काःपिंत दसिपौ लःल्हायेगु ज्याझ्वः किपुलिइ कीर्तिपुर सिनेप्लेक्सय् जुइत्यंगु। ज्याझ्वःया खँ ल्हायेत स्वतन्त्रया थाय् वना। ज्याझ्वःया बारे बीमाःगु जानकारी, भ्वं दक्वं बीधुंकाः स्वतन्त्रं धाल, ‘का बिराज दाई, जि हस्पिटलय् भर्ना जूवने त्यना, जि ज्याझ्वलय् दइमखु। दाइ नं स्वयाः ज्याझ्वः सफल यानाबी मानि न्हि।’ स्वतन्त्रं थथे धाःबलय् जि ला छक्वः छु याये छु याये जुल। थः हे मदइगु इलय् छाय् ज्याझ्वः यायेगु ले, लिछ्याःसां ज्यू नि धयाबलय् स्वतन्त्रया लिसः थन न्ह्यथने हे माः। ‘का दाइ, छु खँ ल्हानागु ९५ म्ये दुतिनेधुंकल। निसः, स्वसः मनूतय् सहभागीता दयेधुंकल। जि छम्हेसिगु कारणं ज्याझ्वः गन दिकेगु ?’
अथे धाःम्ह मनुखं फाइनल ज्याझ्वः न्ह्यः जितः धाःगु खँ लुमनीबलय् जितः आः नुगः मछिंसे च्वनावः। मेन इभेन्ट न्ह्यः जितः कथु स्यात। क्यं वना, डाक्टरं ज्यूसा अप्वः न्ववायेमते, ताताःहाकःगु प्रोग्राम यायेमते धाल। जिं स्वतन्त्रयात व खँ धया, मेम्ह उद्घोषक सःति नं धया। प्रोग्राम निन्हु न्ह्यः च्याटय् खँ ल्हाना, सुइत धया धकाः न्यनां स्वतन्त्रं सुं नं मसःता धाल। ‘दाइ, मदय्क गय् यानां प्रोग्राम यायेगु ग्व? मेपिं सुनां यायेफइ? प्रोग्राम पोस्टपोन यायेलाकि छु?’ स्वतन्त्रं थथे धाल। थः मदय्क ला प्रोग्राम दीमखु धाःम्हेसिनं जि मदय्क गय् यानां प्रोग्राम जुइ धाःगु न्यनाः जिं कथु स्याः धयाच्वने मफुत, ज्याझ्वः याःवना।
ज्याझ्वः क्वचाइथें च्वंकाः स्वतन्त्रं न्ववाःबलय् अवार्ड बी सिमधःनि, स्पेशल अवार्ड बाकि दनी धकाः थः काय् सम्वत, जहान प्रेमायात जि व पासा प्रमिलाया ल्हातं अवार्ड बीकल। अले हाकनं नं अवार्ड बी ल्यं दनी धाधां प्रमिला व जितः नं अवार्ड बिल। थौं व ई लुमंकेबलय्, छेँय् ब्वया तइगु व अवार्डया ट्रफि खनीबलय् स्वतन्त्रं थःगु अन्तिम ई त्यल धकाः उबलय् चायेधुंकूगु खः ला धइथें च्वनावइ। थःगु अन्तिम ई वःगु खँ थुइकाः हे थःगु मतिनाय, थःगु दकलय् लिपांगु चिं जितः उकथं लःल्हानावंगु खःला धइथें च्वनावइगु अले नुगः मछिंसे च्वनावइ।
तसकं च्वछायेबहःगु, असाधारण साहस व प्रतिभां थ्व नां सकसिनं बांलाक हे म्हस्यूगु, सकस्यां यःगु नां जुयावन। थौं झी दथुइ स्वतन्त्रया नश्वर देह मदये धुंकल। थ्व खँयात सुनां पत्याः याये मफयाच्वन तिनि धाये अथवा पत्याः याये हे मास्ते मवयाच्वन तिनि। जितः नं अथे हे जुयाच्वंगु दु। न्ह्याबलें नापलात कि छगू ऊर्जा महसूस जुइगु खः स्वतन्त्रयापाखें। थौं उकथं हे नापलायेगु अवस्था ला मदु, अथेसां वय्कःया व साहसं बियाच्वनिगु ऊर्जा धाःसा दनी, वय्कःया लुमन्ति दनी। स्वतन्त्र, छ स्वतन्त्र कथंया हे जीवन हनावन। आः थ्व संसारया दक्वं दुःख, पीडा, मोह, मायां नं स्वतन्त्र जुयावन। छ बांलाःथाय् लायेमा । छ न्ह्याबलें लुमनाच्वनी।
