बागमती प्रदेशया खानेपानी, ऊर्जा नापं सिँचाइमन्त्री श्यामबहादुर खड्कां थौं मन्त्री पदं राजीनामा बियादीगु दु। मुख्यमन्त्री बहादुरसिंह लामा तामाङयात थौं वय्कलं राजीनामा लःल्हानादिल।

कांग्रेस संसदीय दलया ज्याकुथिइ दलया नेता नापं मुख्यमन्त्री लामाविरुद्ध दर्ता जूगु अविश्वासया प्रस्तावय् सहलह जुयाच्वंगु इलय् मन्त्री खड्कां पदपाखें राजीनामा बियादीगु खः।

थ्व स्वयां न्ह्यः वंगु शुक्रबाः कांग्रेसपाखें प्रदेश सरकारय् ब्वति कयादीम्ह आन्तरिक मामिला नापं कानुनमन्त्री सुरजचन्द्र लामिछाने, संस्कृति नापं पर्यटनमन्त्री विमल ठकुरी, सहकारी नापं गरिबी निवारणमन्त्री मदुकुमार श्रेष्ठ, युवा नापं खेलकुदमन्त्री मीनकृष्ण महर्जनं राजीनामा बियादीगु खः।

उकुन्हु हे मुख्यमन्त्री लामां प्यम्हं मन्त्रीतय्त पदमुक्त यानादीगु खः।

Categorized in राष्ट्रिय