बागमती प्रदेशया मुख्यमन्त्री बहादुरसिंह लामा तामाङं थःम्हं पदं राजीनामा बिइमखु धयादीगु दु।

बागमती प्रदेश कांग्रेस संसदीय दलं थः विरुद्धया अविश्वास प्रस्ताव मतविभाजनपाखें बहुमतं पारित जुइ धुंकाः सञ्चारकःमिलिसे खँल्हाबल्हा यानादिसें मुख्यमन्त्री लामां दलया नेतापाखें चीकूसां मुख्यमन्त्री पदं राजीनामा बिइम्वाःगु व बिइमखु धयादिल।

“संसदीय दलया नेतापाखें चीकूसां नं मुख्यमन्त्री पदं राजीनामा बिइमाः धइगु मदु,” वय्कलं धयादिल, “सरकार छगू ब्व खः, संसदीय दल मेगु ब्व खः।

मुख्यमन्त्री जुइत दलतय् नेता हे म्वाः, उकिं पार्टीया संसदीय दलया नेतापाखें चीकूसां नं मुख्यमन्त्री पदं लिकायेमाःगु छुं नं हुनि मदु।” थः विरुद्धया अविश्वास प्रस्ताव पारित जुइ धुंकाः दलया नेता खालि जूगुलिं नेता मालेगु प्रक्रिया आः सुरु जुइगु वय्कलं धयादिल।

Categorized in राजनीति