नेकपा (एमाले)या आः वइगु भदौय् जुइगु निक्वःगु विधान महाधिवेशनया व्यवस्थापनया निंतिं भाला ब्वथःगु दु।

महाधिवेशन ताःलाकेगु निंतिं थी थी नेतातय्त व्यवस्थापनया भाला ब्यूगु एमाले केन्द्रीय ज्याकुथिया सचिव डा भीष्म अधिकारीं धयादिल। वय्कःया कथं महासचिव शङ्कर पोखरेलया नायःसुइ बुधबाः च्वंगु बैठकं महाधिवेशन प्रतिनिधिया ल्याः पक्का यायेत सङ्गठन विभागयात भाला ब्यूगु दु। झिक्वःगु राष्ट्रिय महाधिवेशनया प्रतिनिधिमध्ये ग्वम्ह सित ?

ग्वम्हेस्यां पार्टी त्वतल उगु फुक्क विषय पक्का यायेत सङ्गठन विभागयात भाला बियागु धकाः केन्द्रीय ज्याकुथिया सचिव डा अधिकारीं धयादिल। अथे हे, स्वास्थ्य ख्यःया भाला स्वास्थ्य लिसें जनसङ्ख्या विभागया प्रमुख कृष्णगोपाल श्रेष्ठ, स्वयंसेवक परिचालनया भाला जनसङ्गठन समन्वय संयन्त्र प्रमुख भानुभक्त ढकालयात, सचिवालय व नसात्वँसा व्यवस्थापनया भाला सचिव डा अधिकारीयात ब्यूगु दु।

महाधिवेशन प्रचारया भाला प्रचार लिसें प्रकाशन विभागया प्रमुख राजेन्द्र गौतमयात, लसकुस हुलाप्याखँ लिसें थी थी साँस्कृतिक ज्याझ्वःया निंतिं केन्द्रीय दुजः हेमराज राईयात व ज्याकुथिया बैठकं यातायात लिसें दबू व्यवस्थापनया भाला केन्द्रीय दुजः विनोद श्रेष्ठयात ब्यूगु दु। महाधिवेशन प्रतिनिधिं च्वनेगु थाय् यागु व्यवस्था थःम्हेस्यां यायेमाःगु दु।

च्वनेगु थाय् व्ववस्था याये मफुम्ह प्रतिनिधिया सम्बन्धित जिल्ला बाय् प्रदेशया सम्पर्क समन्वय कमिटीं व्यवस्थापन यायेमाःगु जुइ। थुकिया निंतिं उगु विभागया इन्चार्ज लालबाबु पण्डितयात भाला ब्यूगु दु। विधान महाधिवेशनय् नीनिसः व न्हय्गुम्ह प्रतिनिधित क्वःछिनातःगु दु।

एमालेया निक्वःगु विधान महाधिवेशन आः वइगु भदौ २० निसें २२ गतेतक यलया गोदावरीइ च्वंगु सनराइज हलय् जुइ त्यंगु दु।

Categorized in राजनीति