नेपाल महिला सङ्घं छुं निश्चित परिस्थितिइ बहुविवाहयात वैधता बिइगु प्रस्तावित कानुन गैरजिम्मेवारपूर्ण, प्रतिगामी लिसें आपत्तिजनक जूगु धासें उगु प्रस्ताव तुरुन्त दिकेगु निंतिं सरकारया ध्यानाकर्षण याःगु दु।

सङ्घं थौं कानुन, न्याय लिसें संसदीय मामिलामन्त्री अजयकुमार चौरसियायात ज्ञापनपत्र लःल्हासें उगु प्रस्तावं मिसा अधिकारया ख्यलय् तःदँनिसें दयाच्वंगु उपलब्धियात स्यंकीगु व बहुविवाह प्रथायात पुनःस्थापति याइगु जूगुलिं तुरुन्त उगु प्रस्ताव लित कायेत इनाप याःगु दु। ”प्रस्तावित व्यवस्थाय् ‘सुं मिजंनं इहिपाः यायेधुंकाः मेम्ह मिसानाप शारीरिक स्वापूूपाखें मचा दूगु अवस्थाय् उम्ह मिसानाप इहिपाः याये मः दुसा यायेफइ’ धइगु खँ न्ह्यथनातःगु दु। थुकिं बहुविवाह थेँ जाःगु फौजदारी अपराधयात वैधानिकता बिइगु प्रस्त कुत तयातःगु दु”, सङ्घं लःल्हाःगु ज्ञापनपतिइ धयातःगु दु।

सङ्घं कानुन मन्त्रालयया उच्च अधिकारीया ‘लिपांम्ह मिसा व वपाखेँया मचाया अधिकार संरक्षणया निंतिं थ्व व्यवस्था हःगु खः” धइगु तर्कपाखे आपत्ति प्वंकूगु दु। “थ्व तर्कं म्वाःमदुगु जक मखुसें मिसाया आत्मसम्मानय् नापं हताः यागु दु”, सङ्घं धाःगु दु, “मिजंया इहिपाः लिपाया स्वापू व गैरजिम्मेवारपनयात कानुनी इहिपाःया नां छुनाः वैधता बिइगु छुं नं ल्याखं न्यायोचित मजू।”याकः मिसा व निजया सन्तानया अधिकारया संरक्षण यायेगु राज्यया दायित्व जूगु धासें सङ्घं थुकिया समाधान बहुविवाह थेँ जाःगु सामाजिक अपराधयात कानुनी मान्यता बिइगु मखु धाःगु दु।

छुं नं त्वःतयाः थुकियात पुनःस्थापना यायेगु धइगु मिसां अन्याय व समानताया निंतिं थाकुक्क यानाःच्वंगु ताःई तक याःगु सङ्घर्षपाखे विश्वासघात जुइगु सङ्घं धाःगु दु। “जिपिं सङ्घीय सरकारयात थ्व गलत मनंतुंगु मिसा विरोधी व प्रतिगामी प्रस्ताव याकनं हे लित कायेत बःबियाः माग यानाच्वना”, सङ्घं धाःगु दु, “सरकारं समानताया आधारभूत सिद्धान्तनाप सम्झौता मयासें सकल मिसा व मस्तय्गु अधिकार संरक्षणया निंतिं न्यायपूर्ण व समतामूलक समाधान मालेत मिसा अधिकारकःमि सङ्घसंस्था व नागरिक समाजनाप फयांफक्व याकनं अर्थपूर्ण संवादय् स्वायेत इनाप यानाच्वना ।”

Categorized in राष्ट्रिय