प्रधानमन्त्री केपी शर्मा ओलीं संविधान व लोकतान्त्रिक प्रणाली मानेमयाइपिंसं संसद्य् पंगः थनाच्वंगु दु धकाः धयादीगु दु।

पूर्वप्रमुख निर्वाचन आयुक्त सूर्यप्रसाद श्रेष्ठं च्वयादीगु ‘लोकतान्त्रिक व जनअभिमत : नेपाःया निर्वाचन इतिहास’ सपूmया थौं लोकार्पण यानादिसें प्रधानमन्त्री ओलीं प्रतिनिधिसभाया बैठकत राष्ट्रिय स्वतन्त्र पार्टीं यानाःच्वंगु मदिक्कं पंगः व बहिष्कारयात सङ्केत यानादिसें संविधान व कानुन दुने च्वनाः स्वतन्त्रतापूर्वक थःगु खँ तये दयाच्वंगु अवस्थाय् नं व्यवस्था दुने हे दुहां वनाः व्यवस्थाया विरुद्ध मिं च्याकेत स्वइगु प्रवृत्ति बांलामजू धकाः धयादिल।

प्रधानमन्त्री ओलीं लोकतान्त्रिक प्रणाली थःहे गलत मजूगु जुसां थुकियात कार्यान्वयन यायेगु प्रक्रियाया सन्दर्भय् गुलिखय् गलत प्रवृत्ति दूगुलिं प्रक्रिया खनेदूगु मगाःमचाःयात भिंकेमाःगु खँय् बः बियादिल। “लोकतान्त्रिक प्रणालीइ सरकार जिम्मेवार जुइ व जनताप्रति उत्तरदायी जुइ। थ्व प्रणालीइ सरकार शासक जुइमखु, व्यवस्थापक व सेवक जक जुइ”, प्रधानमन्त्री ओलीं धयादिल, “जिमिगु मू आज्जु सुशासन व समृद्धि खः।

सुं नं अराजक मजुल धइगु खः सा सरकारं कानुन छ्यले मालीमखु। अराजकता खनेदुसा उकियात कानुनं थःगु लँय् हये मालीगु जुइ।” प्रधानमन्त्री ओलीं नेपाःया निर्वाचन प्रणाली थिकेगु व उम्मेदवारपिंसं क्वःछिनातःगु स्वयां अप्वः खर्च याइगु सन्दर्भय् वक्तापिंसं यानादीगु टिप्पणीया खण्डन यानादिसें थःगु अनुभवय् अथे मजूगु खँ ध्वाथुइकादिल

वय्कलं थः न्हापा गृहमन्त्री व प्रधानमन्त्री जुयादीबलय् नं स्वच्छ निर्वाचन व्यवस्थापनया निंतिं निर्वाचन आयोग लिसेंया निकायलययात छुं हस्तक्षेप मयानाःगु धकाः लुमंकादिल। ज्याझ्वलय् प्रा डा विपिन अधिकारी, मोहना अन्सारी व डा गोपालकृष्ण शिवाकोटीं क्ववालादीगु खः।

Categorized in राष्ट्रिय