आः वइगु भदौलय् नेपाली संकिपानाप स्वापू दूगु स्वंगू ‘अवार्ड’ समारोह जुइत्यंगु् दु।

ग्वसाः खलःतय्सं ब्यागलं ब्यागलं घोषणा याः कथं भदौ २६ गते ‘च्याक्वःगु सिने सर्कल अवार्ड–२०८२’, भदौ २८ गते ‘निक्वःगु इन्टरनेसनल नेपाली फिल्म अवार्ड (इन्फा)’ व भदौय् हे चलचित्र समीक्षक समाजं बिइगु ‘क्रिटिक्स अवार्ड’ जुइ त्यंगु खः। सिरपातं सकिपाःकःमियात हःपाः बिइगु अपेक्षा यानाःगु धकाः ग्वसाः खलः नं धाःगु दु।

‘सिने सर्कल नेपाल’ पाखें ग्वसाः ग्वःगु समारोहय् नीन्यागू विधाय् सिरपाः लःल्हाइगु जूगु दु ‘च्याक्वःगु सिने सर्कल अवार्ड २०८२’या संरक्षक चौधरी समूहया प्रबन्ध निर्देशक वरुण चौधरी जुयादी। समीक्षक लिसें पत्रकारपिनिगु कुसा खलः चलचित्र समीक्षक समाजं छुं दँ न्ह्यःनिसें दिनाच्वंगु ‘क्रिटिक्स अवार्ड’ यात हाकनं न्ह्याकेत्यंगु खः।

समाजया नायः सामीप्यराज तिमल्सेनां अवार्ड लःल्हायेत संकिपा स्वयेगु ज्या जुयाच्वंगु धयादिल। “जिमिसं समीक्षात्मक कथं च्वछाये बहःगु संकिपा व संकिपाकःमियात सिरपा बिइगु यानाच्वनाःगु दु। लिपांगु छुं दँ थी थी हुनिं दिनाच्वंगु सिरपा समारोहयात हाकनं न्ह्याकेत्यनागु दु। जिमिसं संकिपा स्वयेधुंकाः त्याःपिं घोषणा यानाः भदौय् सिरपाः लःल्हायेगु जुइ”, वय्कलं धयादिल।

उगु सिरपा गुंगू विधाय् बिइत्यंगु दु। ‘इन्फा इभेन्ट्स युके’ व ‘इन्फा नेपाल’या ग्वसालय् व मनु मिडियाया मंकाःज्याय् बेलायतया लण्डनय् च्वंगु ग्रिनफोर्ड हलय् भाद्र २८ गते ‘निक्वःगु इन्टरनेशनल नेपाली फिल्म अवार्ड (इन्फा) जुइगु ज्याझ्वःया कजि मनिष कार्कीं धयादिल। “नेपाली कला व तजिलजि प्रवासय् अप्वयेकेत जिमिसं सिरपा लःल्हायेगु समारोह बेलायतय् यानाः च्वनागु दु।

निक्वःगु ब्वःय् तक थ्यंबलय् जिपिं अझं ग्यसु लानाः ज्याझ्वः ग्वसाःग्वया च्वनाःगु दु। जिमिगु संकिपा सम्बन्धी गतिविधिं बेलायतय् बजाः अप्वयेकेत व नेपाली संकिपा प्रवद्र्धनय् तिवः दइ धइगु जिमिसं तायेकाच्वनाःगु दु”, कजि कार्कींं धयादिल। वय्कलं २६ गू विधाय् सिरपा लःल्हायेगु व अभिनेत्री शर्मिला मल्लयात ‘लाइफटाइम अचिभमेन्ट अवार्ड’ पाखें हनेगु धयादिल। छुं ई न्ह्यवं तक म्हुकंचा सःथें अप्वःयाच्वंगु ‘अवार्ड’या ल्याः लिपांगु ई सन्तुलनय् वयाच्वंगु दु।

Categorized in राष्ट्रिय