राष्ट्रपति रामचन्द्र पौडेलं येँया विश्वसम्पदा धलखय् दुथ्याःगु वसन्तपुर लागाय् च्वंगु सम्पदाया अवलोकन यानादीगु दु। थौं न्हापांम्ह मिसा सविता पौडेललिसे वसन्तपुर लागाय् थ्यंकादीम्ह वय्कलं हनुमानध्वाका दरबार संग्रहालयया नं अवलोकन यानादिल।

राष्ट्रपति पौडेलयात दरबार स्क्वायर लागाय् पर्यटन संस्कृति नापं नागरिक उड्डयन मन्त्रालयया सचिव हरिप्रसाद मैनाली, पुरातत्व विभागया महानिर्देशक सौभाग्य प्रधानाङ्ग, हनुमानढोका दरबार सङ्ग्रहालय विकास समितिया कार्यकारी निर्देशक काजीमान प्याकुरेलपिंसं लसकुस यानादिल।

उगु झ्वलय् राष्ट्रपति पौडेलं हनुमानध्वाका दरबार स्क्वायरय् च्वंगु कालभैरव, तलेजु देगः, नौतले दरबार, नासः चुक, मूचुक, त्रिशूल चुकलिसेंया थासय् अवलोकन यानादिल। उगु हे झ्वलय् प्रतिनिधिसभा दुजः सपना राजभण्डारी, प्रदेशसभा सदस्य शैलेन्द्र वज्राचार्य येँ महानगरपालिकाया थी थी वडाया जनप्रतिनिधिपिनिगु न ब्बति दुगु खः।

Categorized in राष्ट्रिय