अमेरिका व युरोपेली संघ (इयुं) रुसपाखें चिकं आयातयात कयाः तःगु न्ह्यसःया भारतं औपचारिक रुपं लिसः ब्यूगु दु।भारतीय विदेश मन्त्रालयया प्रवक्ता रणधीर जैसवालं सामाजिक संजालपाखे प्रतिक्रिया बिउसे भारतं विज्ञप्ति जारी याःगु खः।

वय्कलं युक्रेन युद्ध सुरु जूगु इलंनिसें अमेरिका व इयुं रुसपाखें चिकं आयात यायेगु निंतिं भारतयात लक्षित यानाच्वंगु धयादीगु बीबीसी हिन्दीं जानकारी ब्यूगु दु।युरोपय् परम्परागत आपूर्ति मार्गयात मेथाय् यंकेगु युद्धया प्रतिक्रियाय् भारतं रुसपाखें चिकं आयात यायेगु शुरु याःगु खः।

युद्धया इलय् विश्व चिकं बजारय् स्थिरता कायम यायेत भारतयात चिकं आयात यायेत प्रोत्साहन याःगु अमेरिका हे खः धकाः भारतीय पक्षं थुइकाच्वंगु दु।भारतीय विदेश मन्त्रालयया कथं युरोपेली व रुसया व्यापार उर्जाय् जक सीमित मजू। थुकी खनिज, रसायन, लोहं, स्टील, मेशिनरी व यातायात उपकरण दुथ्याः।

अमेरिकायात उल्लेख यासें विदेश मन्त्रालयया प्रवक्ता जैसवालं आः नं अमेरिकां थःगु आणविक उद्योगया निंतिं रुसपाखें युरेनियम हेक्साफ्लोराइड आयात यानाच्वंगु द्वपं ब्यूगु दु।लिसें वय्कलं विद्युतीय सवारी साधन उद्योगया निंतिं माःगु पार्टपूर्जा व रसायन रुसं अमेरिकाय् वइगु खँ नं न्ह्यथनादीगु दु। थ्व हे हुनिं भारतयात लक्षित यायेगु अनुचित व औचित्यहीन पलाः जूगु प्रतिवेदनय् न्ह्यथनातःगु दु।

Categorized in अन्तर्राष्ट्रिय