नेपालगञ्जय् केन्द्रीय ज्याकुथि दूगु कर्णाली विकास बैंक घोटाला प्रकरणय् उच्च अदालत तुलसीपुर नेपालगञ्ज इजलासं बैंकया संस्थापक अध्यक्षलिसें स्वम्हेसित पुर्पक्षया निंतिं थुनाय् छ्वयेगु आदेश ब्यूगु दु।

राष्ट्र बैंकया पूर्व कर्मचारी भुवन बस्नेतयात निगू लख तका धरौटीइ त्वतेत आदेश ब्यूगु उच्च अदालत तुलसीपुर नेपालगञ्ज इजलासं धाःगु दु। “वय्कलं धरौटी पुले मफुगुलिं आः यात थुनाय् छ्वःगु दु धरौटी पूसा जक वय्कःयात त्वतेगु जुइ”, उच्च अदालत तुलसीपुर नेपालगञ्ज इजलासया सुचं अधिकारी बलबहादुर विष्टं धयादिल।

वय्कःया कथं बैंकया संस्थापक अध्यक्ष राजेन्द्रवीर राय, पूर्वअध्यक्ष पशुपति दयाल मिश्र, बैंकया वित्त विभाग प्रमुख वेदप्रकाश सिंह ठाकुरयात पुर्पक्षया निंतिं थुनाय् तयेगु आदेश ब्यूगु खः। उगु आदेशय् बिस्युं वनाच्वंपिं सच्छिम्ह सिबें अप्वः प्रतिवादीया हकय् म्याद तामेली छ्वयेगु निर्णय न्ह्यथना तःगु दु।

बैंक सञ्चालक समितिया निम्ह पूर्वअध्यक्ष व छम्ह कर्मचारीयात आः हे त्वतेबलय् मुद्दा प्रभावित याये फइगु तायेकाः अदालतं स्वम्हेसित थुनाय् छ्वयेगु आदेश न्यंकूगु धयातःगु दु।अदालतया न्यायाधीशपिं चन्द्रबहादुर सारू व पुनमसिंह चन्दया इजलासं बैंकया पूर्वअध्यक्षलिसें स्वम्ह प्रतिवादीविरुद्धया ध्यबा घोटाला प्रकरणया सुनुवाइ सिधयेकाः बुधबाः उगु आदेश न्यंकूगु खः। बैंकया स्वंगू अर्ब नीगु क्वति ध्यबा हिनामिना प्रकरणय् मुक्कं १०९ म्हेसित प्रतिवादी दयेकूगु खः। उपिंमध्यय् १०३म्ह अझं फरार जुयाच्वंगु दु।

थीथी इलय् ज्वंपिं निम्ह सञ्चालक समितिया पूर्वअध्यक्षलिसें प्यम्ह प्रतिवादीमध्यय् साउन १४ गते सिआबीं थःगु अनुसन्धान प्रतिवेनदय् आर्थिक अनियमितताय् दोषी करार यासें जिल्ला सरकारी वकिल ज्याकुथिइ लःल्हाःगु खः। अदालतया सुचं अधिकारी विष्टया कथं प्यम्ह प्रतिवादीतमध्ये बैंकया संस्थापक अध्यक्षनापं जुयाच्वंम्ह राजेन्द्रवीर राययाके निगू अर्ब ६३ क्वति ३२ लख १६ द्वः ५७९ तका बिगो व बंया माग दाबी याःगु खः।

नेकपा एमालेया केन्द्रीय दुजःनापं जुयाच्वंम्ह कर्णाली विकास बैंकया पूर्वअध्यक्ष पशुपति दयाल मिश्रयाके ८२ क्वति ४६ लख २९ द्वः तका बिगो व बं मागदाबी याःगु दु। बैंकया तत्कालीन वित्त विभाग प्रमुख वेदप्रकाशसिंह ठकुरीयाके २४ क्वति ६३लख ९९ द्वः बिगो व बं मागदाबी याःगु दु। राष्ट्र बैंकया पूर्वकर्मचारी भुवन बस्नेतयाके १० क्वति ८९लख २५० तका बिगो व बंया मागदाबी याःगु खः।बैंकया संस्थापक अध्यक्षलिसें स्वम्हेसित पुर्पक्षया निंतिं थुनाय् छ्वल।

Categorized in अपराध