प्रधानमन्त्री केपी शर्मा ओलीं आर्थिक ग्वाहालि, क्षेत्रीय एकीकरण व मंकाः प्रगतिया भावनाय् नेपाः थः जःला खःला व मेमेगु देय्तलिसेया साझेदारीयात क्वातुकेत प्रतिबद्ध जूगु धयादीगु दु।

भूपरिवेष्टित विकासशील देय्या स्वक्वःगु संयुक्त राष्ट्रसङ्घीय सम्मेलनया झ्वलय् थौं ग्वसाः ग्वःगु ‘भूपरिवेष्टित मुलुकया दिगो पूर्वाधार, सम्पर्क सञ्जालया सबलीकरण व पंगः मदूगु पारवहन प्रणाली’ विषयया उच्चस्तरीय विषयगत राउण्ड टेबलयात संबोधन यासें वय्कलं उगु प्रतिबद्धता प्वंकादीगु खः।

प्रधानमन्त्री ओलीं ‘समृद्ध नेपाः, सुखी नेपाःमि’या नेपाःया जनताया राष्ट्रिय आकाङ्क्षा पूवंकेत नेपालं दिगो व तःगतिं आर्थिक वृद्धि यायेत दिगो पूर्वाधार, सबल कनेक्टिभिटी व निर्वाध पारबहन प्रणालीयात प्राथमिकता बियातःगु ध्वाथुइकादिल। “झीसं सहज व निर्वाध पारबहन व व्यापार सुनिश्चित यायेत सीमापार सम्पर्कयात सक्रिय रूपं तब्याकेगु नापं सुदृढ यायेत्यनागु दु।”, प्रधाननन्त्री ओलीं धयादिल, “आवाजा कार्ययोजनाय् पारित दिगो पूर्वाधार, सबल कनेक्टिभिटी व निर्वाध पारबहन नीति, भूपरिवेष्टित मुलुकतय् विकास, लचिलोपन थेंजाःगु ज्याझ्वः झी आशाया थां खः।

थुगु प्रावधानलिसेंया कार्यढाँचायात भौतिक, डिजिटल व आर्थिक रूपं विश्वव्यापी स्वाइगु झीगु सामूहिक दृढ सङ्कल्पयात नवीकरण यायेत जिं इनाप यानाच्वना।” वय्कलं समता, समावेशीकरण व मंकाः प्रगतिया निंतिं मजिमगाःगु आवश्यकताकथं दूगु पूर्वाधार, कनेक्टिभिटी व ट्रान्जिटय् ध्यान केन्द्रित यायेत इनाप यासें छुं नं देय् थुगु खँय् ल्यूने मलाइगु कथं बांलाःगु भविष्य निर्माणया निंतिं आह्वान यानादिल।

भूपरिवेष्टित विकासशील देय्तय् स्वक्वःगु संयुक्त राष्ट्रसङ्घीय सम्मेलनलिसे सम्बन्धित ज्याझ्वः थौं क्वचायेत्यंगु दु।

Categorized in राष्ट्रिय