भारतया उत्तराखण्ड राज्यय् मंगलवाः व बुधवाः वःगु खुसिबाः व चलः लिपा जाजरकोटया १२ म्ह, बर्दियाया ५ म्ह व जुम्लाया १ म्ह यानाः १८ म्ह तनाच्वंगु दु।

मंगलवाः तच्वकं वा वःगु हुनिं उत्तरकाशीया धरालीबजारय् खुसिबाः वःगु खःसा बुधवाः पौरीगढवालय् चलः वंगु खः।उगु लागाय् मजदुर जुयाः स्याउ लयेत वंपिं नेपाःमित खुसिबाः व चलखय् लानाः सम्पर्क त्वाःदःगु धासें येँ पालिका संघयात समन्वय यायेत इनाप याःगु दु।

जाजरकोटय् च्वंगु कुशे गाउँपालिकाया नायः हरिचन्द्र बस्नेतं छगू विज्ञप्ति जारी यासें १३ म्हसिबें अप्वः बेपत्ता जूगु जानकारी ब्यूगु दु।विज्ञप्तिइ कुशे गाउँपालिकाया वडा ल्याः २ या १३ म्हसिबें अप्वः व मेमेगु वडाया सुं सुं मनूत सम्पर्कय् मदुगुलिं बेपत्ता जूगु जुइफुगु जानकारी सामाजिक संजालपाखें वःगु खँ न्ह्यथनातःगु दु।

बेपत्तापिनिगु मालेगु व उद्धारया नितिं नेपाल सरकार व परराष्ट्र मन्त्रालय मार्फत कूटनीतिक पहल यायेत प्रादेशिक व संघीय सरकारया ध्यानाकर्षण याकूगु दु।अथे हे बुधवाः सुथय् उत्तराखण्डया पौड़ी गढवाल लिक्क सिन्धु खुसिया सिथय् चलः वनाः बर्दियाया प्यम्ह नेपाःमि बेपत्ता जूगु दु।न्हू दिल्लीइ च्वंगु नेपाली दूतावासं मालेगु व उद्धारया नितिं भारतीय पक्षलिसे समन्वय यानाच्वनागु जानकारी ब्यूगु दु।

खुसिबाः प्रभावित क्षेत्रय् उद्धारया ज्या जुयाच्वंगु भारतीय सञ्चारमाध्यमं न्ह्यथंगु दु।

Categorized in राष्ट्रिय