प्रधानमन्त्री केपी शर्मा ओली भूपरिवेष्ठित विकासशील देय्त (एलएलडिसी)या तुर्कमेनिस्तानय् क्वचाःगु स्वक्वःगु संयुक्त राष्ट्रसङ्घीय सम्मेलनय् ब्वति कयाः थौं स्वदेश लिहाँझाःगु दु।

त्रिभुवन अन्तरराष्ट्रिय विमानस्थलया अति विशिष्ट कक्षय् उपप्रधानमन्त्री नापं सहरी विकासमन्त्री प्रकाशमान सिंह, गृहमन्त्री रमेश लेखक, संस्कृति, पर्यटन नापं नागरिक उड्डयनमन्त्री बद्रीप्रसाद पाण्डें प्रधानमन्त्रीयात लसकुस यानादिगु खः।उगु झ्वलय् नेपाल सरकारया मुख्य सचिव, प्रधानसेनापति, सुरक्षा निकायया प्रमुख, नेपाल सरकारया उच्च पदस्थ कर्मचारीलिसें उपस्थिति दूगु खः।

प्रधानमन्त्रीया हनाय् नेपाली सेनां सम्मान गारद देछाःगु खः।तप्यंक पहुँचया अभावय् विश्वव्यापी बजारपाखें खनेदयेक लाभ कायेमफूगु, यातायातया विश्वव्यापी सहज सञ्जाल मदूगु व खाद्य पूर्वाधार विकास यायेत थाकूगु अवस्थाय् दिगो विकासया आज्जुइ थ्यंकेत सम्मेलन फलदायी जुइगु भलसा कयातःगु दु।

प्रधानमन्त्री नेतृत्वयागु उच्चस्तरीय भ्रमण टोलीइ परराष्ट्र मन्त्रालयया सचिव अमृतबहादुर राई, न्हापांम्ह मिसा राधिका शाक्य, प्रधानमन्त्रीया मुख्य सल्लाहकार विष्णुप्रसाद रिमाल, सांसद सूर्यबहादुर थापा क्षेत्री, प्रधानमन्त्रीया प्रमुुख स्वकीय सचिव राजेश बज्राचार्य, निजी चिकित्सक प्रा डा दिव्यासिंह शाह, उच्चपदस्थ सरकारी अधिकारी, सञ्चारकःमि व सुरक्षाकःमितय्गु नं ब्वति दूगु खः।

Categorized in राष्ट्रिय