राष्ट्रपति रामचन्द्र पौडेलं रक्षाबन्धन व गुँपुन्हिया झ्वलय् थौं वैदिक विधि कथं नवयज्ञोपवित (जनै) नापं रक्षाबन्धन ग्रहण यानादीगु दु।

राष्ट्रपति पौडेललिसें न्हापांम्ह मिसा सविता पौडेलं पण्डित अर्जुन न्यौपानेपाखें थौं क्वःज्यूगु साइत कथं वैदिक रक्षाबन्धन ग्रहण यानादीगु राष्ट्रपतिया सचिवालयं धाःगु दु। राष्ट्रपति भवन शीतल निवासय् राष्ट्रपति पौडेललिसें हे थःथिति तय्सं रक्षाबन्धन ग्रहण यानादीगु खः।

थ्व स्वयां न्ह्यः थौं हे राष्ट्रपति पौडेलं जनै पुन्ही, ऋषितर्पणी नापं रक्षाबन्धनया झ्वलय् देशय् विदेशय् च्वंपिं सकल नेपाःमितय्त सुख, शान्ति, सुस्वास्थ्य व प्रगतिया भिंतुना प्वंकादिल। वय्कलं थौं छगू भिंतुना सन्देश बियादिसें नवयज्ञोपवित लिसें रक्षाबन्धन धारण यानाः न्यायेकीगु थ्व नख नं नेपाःमित दथुइ थवंथः सम्बन्ध व सद्भाव क्वातुकीगु भलसा प्वंकादिल।

गुँपुन्हि नापं ऋषितर्पणी नखःया थःगु हे विशिष्ट महत्व दूगु कनादिसें वय्कलं थी थी जातजाति, भाषाभाषी, संस्कृति, नखः चखः व परम्परा दूगु झीगु देशय् न्यायेकीगु थुजाःगु नखः चखः नं थवंथः मित्रता, मतिना व सद्भाव अभिवृद्धि यानाः राष्ट्रिय एकताया भावनायात सुदृढ यायेत योगदान बिइगु भलसा प्वंकादिल।

Categorized in राष्ट्रिय