इराकय् क्लोरिन ग्यास लिक जुया ६०० म्ह तीर्थयात्री अस्पतालय् भर्ना इराकय् क्लोरिन ग्यास लिक जुया ६०० म्ह स्वयां अप्वो तीर्थयात्री अस्पतालय् भर्ना जुइमाःगु दु।

लः प्रशोधन केन्द्रय् क्लोरिन त्वने धुंकाः सासः ल्हायेत समस्या वया ६०० म्ह स्वयां अप्वो शिया तीर्थयात्रीतय्त छुं ईया निंतिं अस्पतालय् भर्ना याःगु अधिकारीपिन्त उद्धृत यासें अल जजीरा समाचार एजेन्सीं जानकारी ब्यूगु दु। मध्य व दक्षिणी इराकया निगू शिया पवित्र शहर नजफ व कर्बलाया दथुइ च्वंगु सतकय् उगु घटना जूगु खः।

थुगुसी लखौं शिया मुस्मां तीर्थयात्रीतय्सं कर्बलाया तीर्थयात्रा याइगु अनुमान याःगु दु।मेखे तीर्थयात्रीया सुरक्षाया जिम्मेवारी कयातःगु सुरक्षाकर्मीं धाःसा कर्बला–नजफ सतकया छगू वाटर स्टेशनपाखें क्लोरिन लिक जूगु धाःगु दु । दशकौंया द्वन्द्व व भ्रष्टाचारया कारणं इराकया आपालं पूर्वाधार जीर्ण अवस्थाय् लानाच्वंगु दु।

वंगु जुलाई महिनाय् पूर्वी क्षेत्रया कुट सहरया छगू सपिङ मलय् मिँ च्यानाः सच्छिम्हसिबें अप्वः मनूत सीगु खः । उकी मध्ये आपालं मनूत चःबिइ हे सीगु अधिकारीपिन्सं धाःगु दु।

Categorized in अन्तर्राष्ट्रिय