छिं सामाजिक सञ्जालय् वइगु थीथी ल्वःवनेपूगु विज्ञापन खंसा छु यानादिया? हथासं उगु विज्ञापनया लिङ्क चायेकादिया कि वास्ता मयासें न्ह्याःवनेगु यानादिया?

सुचं प्रविधिया ख्यलय् जूगु विकास व विस्तार नापं थुकिया सकारात्मक व नकारात्मक निगूलिं ब्वः न्ह्यने वयाच्वंगु दु। सामाजिक सञ्जालयात सकारात्मक कथं छ्यलेगु कि थुकियात नकारात्मक दयेकेगु धयागु छिगु थःगु हे ल्हातय् दूगु खँ खः। लिपांगु दिनय् सामाजिक सञ्जालया दुरुपयोग यायेगु प्रवृत्ति नं उतिकं तच्वया वःगु दु।

सामाजिक सञ्जालया दुरुपयोग यानाः ठगे याइपिं अप्वःयावःगु नेपाल प्रहरीं लिपांगुखुसिइ सार्वजनिक याःगु छगू घटनां क्यंगु दु। उगु घटनां सामाजिक सञ्जालय् वइगु न्ह्यागु नं लिङ्क चायेके मज्यूगु खँय् नं सचेत याःगु दु। नेपाल प्रहरीया कथं लिपांगु ई धितोपत्र बजाःया कारोबारया बारेय् जानकारी बिइगु नामय् ठगे यायेगु यानाहःगु खनेदूगु दु। फेसबुक, इन्टाग्राम, टिकटकलिसेंया सामाजिक सञ्जालय् ल्वःवनेपूगु विज्ञापन क्यनाः ‘नेप्से एआई’ नांया एप डाउनलोड याकाः ठगे याःगु दु। एआई पाखें शेयर बजाःया बिश्लेषण यानाः यक्वः लबः कायेफइगु थेंजाःगु भ्रामक सुचं पिथनाः थुजाःगु एप डाउनलोड याकेगु व उगु एप इन्स्टल यायेलिपा रिमोट सेसन चायेकाः बैंक खाताय् दूगु फुक्कं ध्यबाः घौ पलखय् मेथाय् ट्रान्सफर याःगु खनेदूगु खः।

थुजाःगु एप डाउनलोड जुइ धुंकाः डिजिटल डिभाइसय् दूगु फुक्कं डाटा हुयाः प्रमाण स्यंकाः बिइगु ज्या जुयाच्वन धइगु सुचं लिसें उजुरीत वयाच्वंगु प्रहरीया धापू दु। प्रहरीं भ्रामक प्रलोभनय् लानाः ‘नेप्से एआइ’ लिसेंया छुं नं म्हमस्यूगु एप लिसें लिङ्कत मचायेकेत, डाउनलोड मयायेत नापं सर्वसाधारणतय्त इनाप याःगु दु।प्रहरीया कथं, ‘जोन डोइ (साङ्केतिक नां)’ सामाजिक सञ्जाल फेसबुकय् खनेदूगु विज्ञापनपाखें शेयर बजाःया बिश्लेषण यायेगु निंतिं ‘नेप्से एआइ’ नांया एप डाउनलोड याइ। उगु एप मोबाइलय् इन्स्टल यायेवं उगु एपय् च्वंगु रिमोट सेसन चायेकेवं वय्कःया मोबाइल स्क्रिन छुं ई बन्द जूथे खनेदत।

वहे झ्वलय् निजया नामय् थीथी बैंक खातय् च्वंगु नीच्यागू लख खुइछद्वः तका ध्यबा मेगु खाताय् ट्रान्सफर जूगु खः। अथे हे, निजया मोबाइलय् च्वंगु फुक्कं डाटा लिसें एपत नापं हुयावंगु खः। नेपाल प्रहरीया साइबर ब्यूरोया कथं, न्हापा न्हापा नं थुजाःगु उजुरी वयेगु यानाच्वंगु व लिपांगुखुसिइया उजुरीइ ठगीया न्हूगु रुप खने दूगु खः। साइबर व्यूरों थुजाःगु ज्यापाखें बचे जुइत छुं छ्याता नापं ब्यूगु दु।

सामाजिक सञ्जालयात सुरक्षित दयेकेत निगू सुरक्षा कोड छ्यलेगु बाय् एसएमएसया छ्यलाबुला यायेगु बांलाइ । अथे हे, पासवर्डत इलय् ब्यलय् हिला च्वनेगु यायेमाः।थःगु डिजिटल डिभाइसया बारे म्हमस्यूपिं सुयातं नं छुं कथंया जानकारी मबीगु व आधिकारिक स्रोतपाखें जक एपत इन्स्टल यायेमाः। थुजाःगु घटना जूगु सिइवं सम्बन्धित बैंक, वित्तीय संस्था, लिकसं च्वंगु प्रहरी ज्याकुथिइ वनाः सुचं बिइत नापं साइबर व्यूरों सकसितं इनाप याःगु दु।

Categorized in राष्ट्रिय