अखिल नेपाल फुटबल सङ्घ (एन्फा)या ग्वसालय् राजधानीइ बिहीबाःनिसें एन्फा मिसा लिग छनोट धेंधेंबल्ला ग्वसाः ग्वइगु जूगु दु।

थी थी १४ गू टोलीं ब्वति काइगु उगु छनोट धेंधेंबल्लाय् च्वन्ह्याःगु न्यागू टोली एन्फा मिसा लिगय् छनोट जुइगु थौं थन ग्वसाः ग्वःगु पत्रकार सम्मेलनय् एन्फा प्रवक्ता सुरेश शाहं जानकारी बियादिल। वय्कलं उगु धेंधेंबल्लाया फुक्क तयारी पूवने धुंकूगु धयादिल। धेंधेंबल्लाया कासा सातदोबाटोया एन्फा कम्प्लेक्स व च्यासल मैदानय् जुइ।

ब्वति काःगु १४ गू टोलीयात निगू पुचलय् ब्वथलातःगु दु। गुकिइ पुचः ‘ए’ य् चर्च ब्वाइज युनाइटेड, छहारी फुटबल क्लब, राप्ती एफसी, सिन्धुपाल्चोक एफसी, स्टुडेन्ट फुटबल क्लब, आरबी रिसोर्ट एन्डबीच फुटबल लिसें एफसी रियल लाः।

अथे हे पुचः ‘बी’ इ एनआरटी, सङ्कटा एफसी, बुटवल लुम्बिनी एफसी, एन्बिएम पोखरा गल्र्स एफसी, झापा एफसी, लम्की फुटबल एन्ड ट्रेनिङ सेन्टर लिसें नेपाल खेलकुद क्लब लाः। धेंधेंबल्लाया उलेज्या कासा एफसी रियल व छहारी फुटबल क्लब दथुइ जुइ। उगु कासा न्हिनेसिया १ ताः इलय् जुइ।

Categorized in कासा