नेपाःया टेबलटेनिसया हे दकसिबे अप्वः सिरपाः दां दूगु स्ट्याग ग्लोबल च्याम्पियन्स लिगया सिजन–३ वइगु भदौया न्हापांगु वाय् जुइत्यंगु दु।

अखिल नेपाल टेबलटेनिस सङ्घया तत्वावधान व स्ट्याग च्याम्पियन्स टेबल टेनिस एकेडेमीया ग्वसालय् वइगु भदौ १ निसें ६ गते तक लैनचौरया राष्ट्रिय टेबलटेनिस प्रशिक्षण केन्द्रय् जुइ धाःगु दु। थी थी प्यंगू देय्या कासामि ब्वति काइगु उगु लिगय् विदेशी कासामि तय्त अनुबन्ध यानाः नेपाःया क्लबतय्सं धेंधेंबल्ला याना वयाच्वंगु खः।

स्ट्याग च्याम्पियन्स टेबलटेनिस एकेडेमीया ग्वसालय् २०८० सालंनिसें थ्व धेंधेंबल्ला मद्दिक जुया वनाच्वंगु खः। धेंधेंबल्लाय् याला टेबलटेनिस, होप्स टेबलटेनिस एकेडेमी, एभिएम टेबलटेनिस क्लब, द ड्रागन क्लब, किपू नगरपालिका, भोर्टेक्स नेपाल, ओल्र्ड हाउस रेस्ट्रो, टप स्पिन टेबलटेनिस गुड्स नेपाल, खोल्छा पुखु खेलकुद समिति नापं मुक्कं १० गू क्लब तय्सं ब्वति काइगु ग्वसाः खलकं धाःगु दु।

लिपांगु संस्करणय् च्यागू टोलीं धेंधेंबल्ला याःसां नं थुगुुसी टोलीतय् ब्वति अप्वयेकूगु खः। एकेडेमीया प्रबन्ध निर्देशक नविता श्रेष्ठं डिजिटल लाइटया लिसें कासा जुइगु थाय् आकर्षक दयेकेगु धयादिल। वय्कलं चीन, भारत, पाकिस्तान व ताइवानया कासामितय्सं थी थी क्लबय् आबद्ध जुयाः धेंधेंबल्ला याइगु धयादिल । फुक्क टोलीइ छम्ह मिसा व छम्ह मिजं विदेशी कासामि दइ।

लिग त्याकूपिंत ३ लख दां लिसें रनिङ ट्रफी लिसें ल्यू लाःपिंत १ लख व ५० द्वः दां दइ। लियांल्यू लाःगु निगू टोलीयात म्हतिं ७५ द्वः दां सिरपाः दइ। धेंधेंबल्लाया न्हापांगु संस्करणया उपाधि एभिएम व निक्वःगु संस्करणय् नेपाल पुलिस क्लब च्याम्पियन जूगु खः। थुगुसी धाःसा प्रहरीं ब्वति काःगु मदु।

Categorized in कासा