बाँकेया नेपालगञ्जपाखें प्रहरीं स्रोत खुले मजूगु नीनिगू लख सिबें अप्वो ध्यबा व १५ ग्राम ५०० मिलिग्राम ब्राउनसुगरलिसें छम्हेसित ज्वंगु दु।

ज्वनातःम्ह उम्ह मनूयात बुधवाः जिल्ला अदालत, बाँकेपाखें प्यन्हुया म्याद थप यानाः हिरासतय् कयागु धकाः जिल्ला प्रहरी ज्याकुथिया प्रहरी नायब उपरीक्षक दीपक पातलीं धयादिल।विशेष सुचंया लिधंसाय् जिल्ला प्रहरी ज्याकुथि व लागूऔषध नियन्त्रण ब्यूरो शाखा ज्याकुथि नेपालगञ्जपाखें वंगु पुचलं मङ्गलवाः बहनी नेपालगञ्ज १४ या २८दँ दुम्ह रमेश लोनियाया छेँय् खानतलासी याःगु खः।

उगु झ्वलय् नेपाली व भारतीय यानाः नीनिगू लख स्वद्वः व ९१५ तका ध्यबा लिसें ब्राउन सुगर ज्वंगु प्रहरी नायब उपरीक्षक पातलीं धयादिल।अथे हे, लोनियाया छेँय् लुँ वहया थीथी तिसा, न्यापू खुकुरी, निगः मोटरसाइकल व झिगः मोबाइल नापं ज्वंगु दु।

घटनाय् पंगः थनेत स्वःपिं प्यम्हेसित ज्वंगु व उपिं मध्यय् निम्हेसित प्रहरीयात अभद्र व्यवहार याःगु द्वपनय् हिरासतय् कयातःगु प्रहरी नायब उपरीक्षक पातलीं धयादिल।

Categorized in अपराध