प्रतिनिधिसभाया थौंया बैठकय् राष्ट्रिय प्रजातन्त्र पार्टी (राप्रपा)या सांसद धु्रवबहादुर प्रधानं सदन बहिष्कारयात निरन्तरता बिइगु धयादीगु दु।

वय्कलं अनियमितता दिकेत न्यायिक समिति पलिस्था मजूतले संसद् वहिष्कार यानाःतुं च्वनेगु धयादिल।थौं नं राप्रपा व राष्ट्रिय स्वतन्त्र पार्टी (रास्वपा)या सांसदपिंसं बैठक त्वताः पिहां वःगु खः। बैठक बहिष्कार याये न्ह्यः राप्रपाया सांसद प्रधानं राज्य व्यवस्था लिसें सुशासन समितिया सभापति रामहरि खतिवडां नैतिकताया लिधंसाय् बियादीगु राजीनामां सकारात्मक सन्देश जूगु धका धाःगु खः।

“नियतबश जूगु जुसां नैतिकतकताया लिधंसाय् राजीनामा बियाः जक गाःगु कि मगाःगु? भिजिट भिसा प्रकरणय् गृहमन्त्री रमेश लेखयात न्ह्यसः थंगु दु। अनियमित विषय पनेत न्यायिक छानबिन समिति नीस्वनेमाः”, वय्कलं धयादिल, “जिपिं सदन बहिष्कार यायेगु प्रक्रियायय् दु।

”रास्वपाया सांसद चन्दा कार्कीं बुधवाः प्रतिनिधिसभाया बैठकय् प्रधानमन्त्री केपी शर्मा ओलीं पार्टी सभापति रवि लामिछानेया विरुद्धय् बियादीगु अभिव्यक्तिया विषयय् आपत्ति प्वंकादिल । “अदालतया फैसला सरकारं जिम्मा काये मफइगु बांलागु खँ मखु। राज्यं हस्तक्षेप याःसेलिं स्वतन्त्र न्यायपालिका गथे यानाः जुइ फइ ? जिं सदनपाखें ध्यानाकर्षण याना च्वनाः”, वय्कलं धयादिगु खः।

Categorized in राजनीति