साल्ट ट्रेडिङ कर्पाेरेशन लिमिटेडं १५ लख २३ द्वः बोरा रासायनिक मल भारतया कोलकत्ता बन्दरगाहय् वये धुंकूगु व उगु मल धमाधम नेपाःया कर्पाेरेशनया गोदमय् हयेगु ज्या जुया च्वंगु धाःगु दु।

कर्पाेरेशनं आः नकतिनि धइथें जक प्यंगू लख ४० द्वः बोरा युरिया व झिगू लख व ८३ द्वः बोरा डिएपी नापं मुक्कं १५ लख २३ द्वः बोरा रासायनिक मल आयात याःगु खः। गोदमय् वया च्वंगु उगु मल कोटा वितरणया निंतिं प्रदेश सरकारयात पौ छ्वये धुंकूगु व प्रदेश सरकार तय्सं पालिकायात कोटा वितरण जुइ धुंकूगु धइगु जानकारी कर्पाेरेशनयात वःगु नं सस्थां ध्वाथुइकूगु दु।

रासायनिक मलया लिपांगु अवस्थाया बारे कर्पाेरेशनं शुक्रबाः पिकाःगु विज्ञप्तिइ धयातःगु दु, “कर्पाेरेशनया मल बिक्रेता कथं दर्ता जूगु दक्व डिलर तय्त थःगु पालिका नापं कर्पाेरेशनया सम्बन्धित ज्याकुथिलिसे समन्वय यनाः कोटाकथंया मल बिक्री वितरण यायेत इनाप याना च्वना।

”थौंकन्हय् बजारय् रासायनिक मलया अभाव जूगु धकाः थी थी सञ्चार माध्यम नापं सामाजिक सजालय् बुखँ नापं पोष्ट जुया च्वंगुलिं कर्पाेरेशनं विज्ञप्तिपाखें थःगु ध्यानाकर्षण जूगु नं धाःगु दु।

Categorized in राष्ट्रिय