सङ्घीय सरकारं च्वन्ह्याःगु लिच्वः हःगु खुगू स्थानीय तहयात हनेत्यंगु दु। सङ्घीय मामिला लिसें सामान्य प्रशासन मन्त्रालयं थ्वहे भदौ ६ गते आर्थिक दँ २०८०÷८१ या स्थानीय तह संस्थागत क्षमता स्वमूल्यांकन (लिसा)य् च्वन्ह्याःगु लिच्वः हःगु स्थानीय तह घोषणा यानाः हनेत्यंगु खः।

‘गाउँपालिका÷नगरपालिकाया ज्या प्रक्रिया व उपलब्धीया ल्याःचाः यानाः शासकीय प्रक्रिया व विकास व्यवस्थापनय् यायेमाःगु सुधारया ख्यःत म्हसिकेगु, आवधिक समीक्षाया आधार प्राप्त यायेगु व स्थानीय सरकार दथुइ स्वस्थ धेंधेंबल्लाया भावना पिब्वयेकेगु तातुना कार्यान्वयनय् दूगु स्थानीय तह संस्थागत क्षमता स्वमूल्याङ्कनया आदँ २०८०÷८१ या लिच्वः गुणस्तर परीक्षण’ क्वचाःगु मन्त्रालयं धाःगु दु। गुणस्तर परीक्षण लिपा कायम जूगु स्वमूल्याङ्कनया लिपांगु लिच्वः सार्वजनिक यानाः राष्ट्रिय स्तरय् दकसिबे यक्वः ल्याः हःगु गाउँपालिका लिसें नगरपालिकायात हनेत्यंगु खः।

थुकिया हे लिधंसाय् मन्त्रालयं खैरहनी नगरपालिका चितवन, तिलोत्तमा नगरपालिका रुपन्देही, नीलकण्ठ नगरपालिका धादिङ, अर्जुनचौपारु गाउँपलिका स्याङजा, बेनीघाट रोराङ गाउँपालिका धादिङ व रुरु क्षेत्रगाउँपालिका गुल्मीयात हनेत्यंगु खः। राष्ट्रिय स्तरय् दकसिबे यक्वः ल्याः हःगु गाउँपालिका लिसें नगरपालिकायात सङ्घीय मामिला लिसें सामान्य प्रशासनमन्त्री भगवती न्यौपानेया उपस्थितिइ हनेगु व स्थानीय शासन कार्यसम्पादन मूल्याङ्कन प्रणालीयात न्ह्याकेगु ज्याझ्वः क्वःछिनातःगु दु।

Categorized in राष्ट्रिय