मध्यपुरथिमि नगरपालिकां वडा नं ९ य् लाःगु नीलबाराही देगः लागा संरक्षण लिसें भिंकेज्या मध्यपुरथिमि नगरपालिका व काठमाडौँ उपत्यका विकास प्राधिकरणं मंकाः कथं न्ह्याकीगु जूगु दु।

नगरपालिकाया प्रमुख सुरेन्द्र श्रेष्ठं धयादिगु दु, देगःया पूर्व व पश्चिमपाखे भूक्षय नियन्त्रणया निंतिं गुरुयोजना पारित याःगु दुसा नीगु करोड तका बजेट विनियोजन जूगु धयादीगु दु। अथे हे याकनं ज्या न्ह्याइगु नं वय्कलं धयादिल।

नगरप्रमुख श्रेष्ठं धयादिल, “आः वइगु निदँया दुने थ्व परियोजना क्वचाइगु कथं ज्या यायेगु जुइ। उकिया लिपा नीलबाराही लागायात ल्वःवनेपूगु पर्यटकीय स्थलया कथं विकास यायेगु जुइ। नीलबाराहीया न्यासः पी जग्गा सिमाङ्कन यायेगु जुइ।”नगरपालिकां उगु परियोजनाबारे मङ्कलवाः सर्वसाधारणतय्त जानकारी बिसें नक्सालिसेंया ‘डिजाइन’ सार्वजनिक याःगु खः।

उगु झ्वलय् नीलबाराही संरक्षण अभियन्तानाप मंकाः ज्या यायेगु नं धाःगु खः। चलःया जोखिमय् लाःगु नीलबाराही देगः लागाया संरक्षणया निंतिं स्थानीयं अभियान न्ह्याकाच्वंगु दु।

Categorized in राष्ट्रिय