पर्यटन विभागं थःगु सेवायात व्यवस्थित व प्रविधिमैत्री दयेकीगु जूगु दु। विभागं कार्यसम्पादनयात छसि कथं संस्थागत, प्रक्रियागत सरलीकरण, प्रणालीगत सुधार व प्रविधिगत नियमनय् बः ब्यूगु धाःगु दु।

पर्यटन प्रशासनयात व्यवसायमैत्री, लगानीमैत्री व प्रविधिमैत्री दयेकाः थ्व ख्यलय् आकर्षण अप्वयेकेगु विभागया आज्जु दु। अन्तरराष्ट्रिय अभ्यासयात राष्ट्रिय प्रणालीइ स्वायेगु लिसें पर्यटकीय गतिविधिया विकास व विस्तार यायेगु ज्यायात न्ह्यपलाखय् तःगु विभागं नकतिनि पिथंगु वार्षिक प्रतिवेदनय् न्ह्यथनातःगु दु। विभागया महानिर्देशक डा नारायणप्रसाद रेग्मीं विभागया ज्यायात अःपुकेत व व्यवस्थायमैत्री दयेकेत पलाः न्ह्याकागु धयादिल।

वय्कःया कथं विभागं न्हापांखुसी वार्षिक प्रतिवेदनपाखें सम्पादन याःगु ज्या व भावी कार्ययोजनाया नापनापं हाथ्या व कन्हय्या दिनय् भिंकायंकेमाःगु विषययात दुथ्याकूगु दु। महानिर्देशक रेग्मीं प्रक्रियागत झन्झटयात चिइका यंकाः नियमित सम्पादनयात न्ह्यने यंकागु धयादिल। नीतिगत सुधारया लँय् नं विभाग केन्द्रित जूगु वय्कलं धयादिल।

“नेपाःया प्राकृतिक सौन्दर्य, सांस्कृतिक विविधता, जैविक सम्पदा लिसें मानव सिर्जित धरोहरतय्गु संरक्षण व प्रवद्र्धनपाखें देय्यात अन्तरराष्ट्रियस्तरय् छगू ल्वःवनेपुसेच्वंगु, सुरक्षित व न्ह्यइपुसेच्वंगु पर्यटकीय गन्तव्यस्थलया कथं पलिस्था यायेगु दीर्घकालीन आज्जु कयागु दु”, महानिर्देशक रेग्मीं धयादिल, “पर्यटन ख्यलय् आर्थिक ज्याखँत अप्वयेकाः लजगाः व स्वरोजगारीया ह्वःताः चुलाकेगु, दिगो गुणस्तरीय पर्यटन प्रवद्र्धन, पर्यटकया सेवा सुविधा व सुरक्षा सुनिश्चित यायेत थुकिं ग्वाहालि याइ।”विभागं पर्यटकीय पूर्वाधारया विकास, गुणस्तरीय पाहाँ सेवा व्यवस्थापन, साहसिक व पर्वतीय पर्यटनया प्रवद्र्धन लिसें पर्वतारोहण व्यवस्थापनया ख्यलय् थप योजनालिसें ज्या जुयाच्वंगु धाःगु दु।

Categorized in राष्ट्रिय