दँय् दसं भाद्र कृष्ण औँशीया दिं राजधानीया उत्तरपूर्वी भेगय् च्वंगु गोकर्णेश्वर महाद्यः देगः लागाय् न्ह्याइगु मेलाया फुक्कं तयारी पूवंगु दु। बाया ख्वाः स्वयेगु दिंया कथं लोकंह्वाःगु थुगु नखःया दिं अबु मदुपिंसं गोकर्णेश्वरय् वयाः थः अबुया नामय् तर्पण, पिण्ड दान लिसें श्राद्ध यानाः निसलाः बिइगु वैदिक सनातनी परम्परा दु।

थ्वहे कथं गोकर्णेश्वर महाद्यःया देगः जःखः शनिबाः द्वलंद्वः भक्तजनत पितृयात सम्मान पिब्वय्त वइगुलिं मेलाया निंतिं बिहीबाःनिसें तयारी याःगु दु । मेलाया फुक्कं कथंया तयारी पूवंगु देगः लागाया प्रबन्ध समितिं धाःगु दु। उत्तरगया धकाः म्हसिका दूगु गोकर्णेश्वर महाद्यः देगः लागाय् पितृ सम्मान दिवसया मेलाया निंतिं फुक्कं तयारी पूवंगु समितिया नायः लिसें गोकर्णेश्वर नगरपालिका–४ या वडाध्यक्ष जयराम महतं धयादिल। मेला व्यवस्थापन यायेत थनिनिसें हे निसः सिबें अप्वः स्वयंसेवकत छ्यःगु वय्कलं धयादिल। व्यवस्थापनया निंतिं न्हय्गू उपसमितित नीस्वनाः तयारी याःगु दु।

यातायात व्यवस्थापन, आर्थिक, स्वयंसेवक परिचालन, स्वास्थ्य, खोजतलास, धार्मिक, समन्वय लिसें उपसमिति नीस्वनातःगु दु। शनिबाः नेपाल मेडिकल कलेज व माकालबारीइ च्वंगु चिंधंगु ताँ लागाय् हे सार्वजनिक यातायात दिकाः देगः लागाय् दुत मछ्वयेगु यानाः तयारी याःगु समितिं धाःगु दु।आमैया छन्हु न्ह्यः थौं सुथय्निसें हे भक्तजनत देगः लागाय् वयेगु याना च्वंगु दु। तातापाक्कं निसें वइपिं भक्तजनत थौं हे देगः लागाय् थाय् व्यवस्थापन यानाः च्वंवये धुंकूगु दु । देगः लागाय् अबुया सम्मान यायेत भक्तजनत वइगु जूगुलिं थ्व औँशीयात गोकर्णे औँशीया नामं नं म्हस्यू ।

थ्व दिं कुन्हु गोकर्णेश्वर महाद्यः देगः लागाय् मदुम्ह अबुया नामय् तर्पण, पिण्डदान व सिधादान (निसलाः) बिइपिं म्वःम्वः दइ। थ्वहे नखःया झ्वलय् रसुवाया बेत्रावती, देवघाटलिसेंया दोभान व त्रिवेणीइ नं पितृयात लुमंकाः श्राद्ध, तर्पण याइपिं थ्यंकेगु यानाच्वंगु दु। ‘पितृदेवो भवः’ धइगु धार्मिक मान्यता कथं थ्व दिं काय्म्हाय्पिंसं थः म्वाम्ह अबुयात श्रद्धाकथं यःयःगु नसात्वँसा नकाः त्वंकाः आशीर्वाद काःसा सुख दइ। मदुम्ह अबुया नामय् धाःसा गाकर्णेश्वर लिसेंया तीर्थय् वनाः श्रद्धाकथं तर्पण, पिण्डदान व निसलाः बिइगु याइ। थ्व दिं कुन्हु भचा जक दान याःसां द्वलंद्वः स्वयां अप्वः फल दइ धकाः शास्त्रय् धयातःगु दु।

थ्व दिं कुन्हु छेँछेँय् पवित्र कुश दुकानाः कुशे औँशी नखः नं न्यायेकी । दच्छियंकं देवज्या लिसें पितृज्या लिसेंया धार्मिक ज्याय् छ्यलीगु कुश थ्व दिं वैदिक मन्त्र ब्वनाः उगु कुश लिनाः छेँय् हयाः तइ। शास्त्रोक्त विधिकथं ब्राम्हणपाखें पुजाः यानाः लिनाहयाः जजमानथाय् थ्यंकूगु कुश छेँय् तयेबलय् छेँजःया कल्याण जुइगु विश्वास यानातःगु दु।

सनातन धर्मावलम्बीं कुश, तुलसी, वंगलसिमा व शालिग्रामयात नारांद्यःया चिं कथं कयातःगु दु। सृष्टिकर्ता ब्रम्हां विवेकशील प्राणीलिसें पवित्र कुश नं उत्पन्न यानादीगु शास्त्रीय मान्यता दु।

Categorized in राष्ट्रिय