सञ्चारलिसें सुचं प्रविधिमन्त्री पृथ्वीसुब्बा गुरुङं मिडियाया नामय् खनेदूगु अराजकताया नियमन यायेत सरकारं सामाजिक सञ्जाल छ्यलाबुला, सञ्चालन व नियमन यायेगु विधेयक हयेत्यनागु धयादीगु दु।

प्रेस चौतारी नेपाल कास्कीपाखें थौं पोखराय् ग्वसाः ग्वःगु पत्रकार सम्मेलनय् वय्कलं सरकारं हयेत्यंगु उगु विधेयकया सम्बन्धय् अःखः खँ थ्वयेकेत स्वःगु धयादिल। मन्त्री गुरुङं धयादिल, “थ्व विधेयक नियन्त्रण मखुसें नियमनया निंतिं हयेत्यनागु खः। थ्व सरकार लोकतान्त्रिक सरकार खः।

थुकियात लोकतान्त्रिक मूल्य मान्यतायात क्वत्यलेगु कथं ज्या यायेगु छुत मदु।” राष्ट्रियता, राष्ट्रिय स्वाधीनता व राष्ट्रिय छवाः विरोधी छुं नं गतिविधि सहयाये मफइगु धयादिसें वय्कलं ‘साइबर क्राइम’या नियन्त्रण यायेमाःगुलिं कानुनी आधार निर्माण यायेत ऐन हयेत्यनागु धकाः ध्वाथुइकादिल। मन्त्री गुरुङं प्रष्ट कानुन मदुबलय् विद्युतीय अपराध नियन्त्रण याये थाकुयाच्वंगु व गुला–झिलाया दुने हे साइबर क्राइमसम्बन्धी १९द्वः सिबें अप्वः उजुरीत प्रहरीइ वःगु खनेदूगु धयादिल।  अथे हे वय्कलं प्रेस काउन्सिल विधेयकयात प्रतिस्थापन यायेत मिडिया काउन्सिल विधेयक हये त्यनागु धयादिसें थ्व विधेयकं फुक्कं कथंया मिडियायात नियमन याइगु धयादिल।

थ्वसिबें न्ह्यः प्रेस काउन्सिल विधेयक वःबले ‘अनलाइन’तय्गु विकास मजूनिगु जुयाः थ्व विधेयकं फुक्कं कथंया मिडियाया नियमन याइगु मन्त्री गुरुङया धापू दु । “सञ्चार ख्यः सम्बन्धित पुलांगु कानुनया परिमार्जनलिसें माःगु न्हूगु फुक्कं कथंया कानुन हयेगु लँपुइ जुया च्वनागु दु”, वय्कलं धयादिल।

Categorized in राष्ट्रिय