महाकवि सिद्धिदास महाजुया नामं तःधंगु धनराशीया स्वंगू सिरपाः पलिस्था जूगु दु।

विशेष यानाः न्हूपिं च्वमिपिंत लक्षित यानाः पलिस्था जूगु थ्व स्वंगू सिरपाः निगू लाख तकाया, छगू लाख तकाया व न्यय्द्वः (५० हजार) तकाया खः।थुकी १३ निसें १५ दँ तकयापिं मस्तय् दथुइ जुइगु निबन्ध कासाया उत्कृष्ट छम्हेसियात न्यय्द्वः (५० हजार) तकाया सिरपाः बी। अथे हे १६ निसें १७ दँया किशोर मस्तय् दथुइ जुइगु चिनाखँ कासाया उत्कृष्ट छम्हेसित छगू लाख तकाया सिरपाः बी।

अनंलि १८ दँ स्वयां च्वय्यापिं च्वमिपिनि दथुइ जुइगु चिनाखँ कासाया उत्कृष्ट छम्हेसित निगू लाख तकाया सिरपाः बी।नांजाःम्ह गायक लिसें उद्यमी योगेश्वर अमात्यं थ्व सिरपाः पलिस्था यानादीगु खः। वय्कलं निदँ न्ह्यः नं थीथी विधाय् महाकवि सिद्धिदास सिरपाः तयादीगु खःसां दथुइ दछि स्थगित जुयाः आः न्हूकथं सिरपाः बीगु व्यवस्था यानादीगु खः। थुकी देय् न्यंकं च्वंपिं न्ह्याम्ह नं च्वमिपिंसं ब्वति काये फइ। निबन्ध व कविताया लागिं छुं विषय तोके यानातःगु मदु ।

तर निगुलिं विधाया भाषा धाःसा नेपालभाषा जुइमाः। खास यानाः न्हूपिं च्वमिपिंत नेपालभाषा च्वये व ब्वनेपाखे आकर्षित यायेगु ताः तयाः मस्तप्रति लक्षित यानाः थुलिमछि धनराशीया सिरपाः पलिस्था जूगु खँ सिरपाः ग्वसाः पुचःया कजि लिसें जनबहाःद्यःया गुर्जु निलकाजी शाक्यं कनादीगु दु।

भाषाया सेवा याना वंपिं हनेबहःपिं भाषासेवीपिंत समेत सम्मान प्वंकुसें नेपालभाषाय् च्वयेगु व ब्वनेगु ज्याय् वयाच्वंगु म्हतियात पनाः न्हू पुस्तायात थुखेपाखे साला कायेगु लागिं छुं यायेमाः धइगु बिचाः यासें दाता योगेश्वर अमात्यं थ्व न्हूकथंया सिरपाः पलिस्था यानादीगु खँ नं शाक्यं कनादिल। थुकी ब्वति काइपिं सहभागीपिंसं आः वइगु सिद्धिदास बुन्हि तकया दुने थःपिनि रचना दुथ्याकेमाःगु कथंया ई क्वःछिनागु व याकनं हे थ्व सम्बन्धी पूवंक जानकारी पिहां वइगु खँ नं शाक्यं कनादीगु दु।

Categorized in राष्ट्रिय