समाजवादी गणतन्त्र भियतनामया उपराष्ट्रपति भो थि आन सुआन नेपाःया स्वन्हुया औपचारिक भ्रमणया निंतिं थौं थन झायादीगु दु।

उपराष्ट्रपति रामसहायप्रसाद यादवया मैत्रीपूर्ण ब्वनाय् वय्कः नेपाः भ्रमणय् झायादीगु खः।उपराष्ट्रपति सुआनयात थौं त्रिभुवन अन्तरराष्ट्रिय विमानस्थलया तसकं विशिष्ट कक्षय् परराष्ट्रमन्त्री डा आरजु राणा देउवा व सस्कृति, पर्यटन नापं नागरिक उड्डयनमन्त्री बद्रीप्रसाद पाण्डें लसकुस यानादिल।

उगु झ्वलय् नेपाल सरकारया विशिष्ट श्रेणीया कर्मचारी, सुरक्षा निकायया पदाधिकारीलिसें विशिष्ट व्यक्तित्व उपस्थित जुयादी। उपराष्ट्रपति सुआनं वय्कःया हनाबनाय् नेपाली सेनां लःल्हाःगु गार्ड अफ अनरया निरीक्षण यानादिल। वय्कःलिसे थौं हे परराष्ट्रमन्त्री डा राणां नापलाना खँल्हाबल्हा यानादी धकाः मन्त्रालयं धाःगु दु।

वय्कः थ्व हे भदौ ९ गते तक नेपाःया भ्रमण यानादी। भियतनामपाखें नेपालय् जूगु थ्व न्हापांगु उच्चस्तरीय भ्रमण खः। भ्रमणया झ्वलय् उपराष्ट्रपति यादव व वय्कःया समकक्षी सुआन दथुइ भदौ ८ गते येँय् प्रतिनिधिमण्डस्तरीय निगूपक्षीय वार्ता जुइगु मन्त्रालयं धाःगु दु।

उपराष्ट्रपति सुआनं भ्रमणया झ्वलय् राष्ट्रपति रामचन्द्र पौडेल व प्रधानमन्त्री केपी शर्मा ओलीलिसे बिस्कंबिस्कं नापलाइगु ज्याझ्वः दु। थुगुसी नेपाः व भियतनाम दथुइ कूटनीतिक सम्बन्ध स्थापना जूगु ५० दँ क्यंगुलिं थ्व भ्रमणयात विशेष महत्व बिया कयातःगु दु। उपराष्ट्रपति सुआन भ्रमण पूवंकाः भदौ ९ गते स्वदेश लिहाँझाइगु धलः दु।

Categorized in राष्ट्रिय