समाजवादी गणतन्त्र भियतनामया उपराष्ट्रपति भो थि आन सुआनलिसे परराष्ट्रमन्त्री डा आरजु राणा देउवां थौं थन नापलानादीगु दु। उपराष्ट्रपति रामसहायप्रसाद यादवया मैत्रीपूर्ण ब्वनाय् नेपाःया स्वन्हुया औपचारिक भ्रमण यायेत थौं येँय् झाःम्ह उपराष्ट्रपति सुआनयात मन्त्री डा राणां नापलानादिल।

उगु झ्वलय् नेपाः भियतनाम सम्बन्धया थी थी आयामत लिसें निगूपक्षीय हित व थवंथः च्यूताःया विषयखँल्हाबल्हा जूगु खः। मन्त्री डा राणां लिपांगु इलय् तःगतिं आर्थिक विकास याःगुलिं भियतनामयात बधाई बिसें थ्व आर्थिक विकासपाखें मेमेगु देशं नं सयेकेमाःगु धारणा तयादिल। मन्त्री डा राणां निगुलिं देय् दथुइया सांस्कृतिक सम्बन्धयात व बौद्ध धर्म निगुलिं देय् व जनताया दथुइया सम्बन्ध क्वातुकेत छगू सबल कडी जूगुलिं बः बियादिल।

वय्कलं भगवान गौतम बुद्ध बूगु थाय् लुम्बिनीया भ्रमणय् यक्व भियतनामी नागरिकत वइगु प्रसङ्ग न्ह्यथनादिसें सांस्कृतिक पर्यटन प्रवद्र्धनया ख्यलय् निगुलिं देय् मिले जुयाः ज्या यायेफइगु नं धयादिल। लिपांगु इलय् नेपाः व भियतनामया पर्यटकतय् ल्याः खनेदयेक बृद्धि जूगु जानकारी बिसें मन्त्री डा राणां थ्व ह्वःताःया उपयोग यानाः निगुलिं देय् पर्यटन ख्यःया प्रवद्र्धनय् सहकार्य यानाः न्ह्याःवनेमाःगु धारणा तयादिल।मन्त्री डा राणां भियतनामपाखें नेपाःया भैरहवाया गौतमबुद्ध अन्तरराष्ट्रिय विमानस्थल व पोखरा विमानस्थलय् उडानया वातावरण निर्माणया निंतिं नं इनाप यानादिल।

अथे हे वय्कलं नेपाः वइगु सन् २०२६ लिपा तसकं म्ह्वः विकसित देय्पाखें स्तरोन्नति जुइगु तयारीइ दूगुलिं अनंलिपाया अवस्थाय् आवश्यक ग्वाहालिया निंतिं नं भियतनामयात इनाप यानादिल। नाप लायेगु झ्वलय् मन्त्री डा राणां नेपाः सन् २०२७ निसें २०२९ तकया निंतिं मानवअधिकार परिषद्या दुजः व २०२९ निसें २०३१ तकया निंतिं आर्थिक व सामाजिक परिषद्या दुजलय् उम्मेदवारी ब्यूगुलिं उकिइ ग्वाहालिया निंतिं इनाप यानादीबलय् उपराष्ट्रपति भों नेपाःयात ग्वाहालि बिइगु प्रतिबद्धता प्वंकादिल।

नेपाः व भियतनाम निगूपक्षीय व बहुपक्षीय तहय् छम्हंमेम्हेसित ग्वाहालि व समर्थन यानावयाच्वंगु न्ह्यथनादिसें दक्षिण–दक्षिण ग्वाहालि, जलवायु ह्यूपाःथेंजाःगु विश्वव्यापी एजेण्डातय्के वइगु इलय् नं सहकार्य यानाः न्ह्याःवनेमाःगुलिइ सहलह जूगु खः। जी ७७, नन अलाइन्मेन्ट मुभमेन्ट (नां)या दुजः देय्कथं नेपाः व भियतनाम विकासशील देय्तय्गु हित रक्षाया निंतिं छधी जुयाः ज्या यानाच्वंगु उगु झ्वलय् उपराष्ट्रपति भो व परराष्ट्रमन्त्री डा राणां धयादिल।

Categorized in राष्ट्रिय