येँ महानगरपालिका १८ वडा अध्यक्ष न्हुच्छेकाजी महर्जनया न्हूगु निपू म्ये पितब्वज्या जूगु दु। यंलाथ्व पारु कुन्हु थःगु बुदिंया लसताय् निपू म्येया पितब्वज्या यानादीगु खः।

छम्ह म्ये च्वमि कथं व नेपालभाषाया सांगीतिक ख्यलय् यक्वस्यां म्हस्यु सां अभिनय् ख्यलय् नं न्हूच्छे काजी महर्जनया आपालं हे भिडियो पिथना दीधुंकुगु दु। आइतवाः पिदंगु म्ये मध्ये छपू म्येय् वय्कलं हे निर्देशन यानादीगु दु। “तिम्रो दिलमा चोट लाग्दा” बोलया नेपाली खस म्येया निर्देशन न्हूच्छे काजी महर्जन थःम्हं हे यागुलि अनिल शाहीया सः व संगीत नं तयादीगु, छायाँकन व सम्पादन सुरेन्द्र महर्जनं याःनादीगु दु।

म्येय् न्हूच्छे काजी महर्जन व रविना महर्जनं अभिनय यानातःगु दु। अथे हे मेगु म्ये “जि यःम्ह सिरिमतिचा” बोलया म्ये नं पिदंगु खः। थुगु म्ये राजमतिया लोक लसय् अनिल शाहीं न्हूगु एरेन्ज यानातःगु खःसा म्येय् राजेन्द्र शाक्य व सविना मानन्धरं हालातःगु खः। थुगु म्येय् नेपालभाषाया लोकंह्वाःम्ह कलाकार रवि डंगोल लिसें रविना तुलाधरं अभिनय यानातःगु दु। म्येया निर्देशन बाल मुकुण्द प्रजापतिं यानादीगु खः। अथेहेतुं छायाँकन व सम्पादन सैलेश श्रेष्ठ लुभुं यानादीगु थ्व भिडियोया परिकल्पनाकार केबि एस लुभु खः।

येँ महानगरपालिकाया पूर्व मेयर विद्यासुन्दर शाक्य मू पाहां कथं झायादीगु खःसा नेपालभाषाया न्हापांम्ह सिने पत्रकार बिजयरत्न असंबरें निगुलि म्युजिक भिडियोया समिक्षा यानादीगु खः।

न्हूच्छे काजी महर्जनया बुदिंया लसताय् ज्याझ्वलय् म्ये हालामि रीता महर्जन, सरस्वती मानन्धर, राजेन्द्र शाक्य, सविना मानन्धर व रोजी श्रेष्ठ डंगोल पिन्सं सांगीतिक प्रस्तुति नं न्ह्यब्वयादीगु खः।

Categorized in मनोरन्जन