स्वंगूगु व लिपांगु एकदिवसीय अन्तर्राष्ट्रिय कासाय् घरेलु टिम अष्ट्रेलियां दक्षिण अफ्रिकायात २७६ रनं बुकूगु खः।एकदिवसीय क्रिकेटय् दक्षिण अफ्रिकाया थ्व हे दकलय् बामलाक्क बूगु कासा जुगु दु।

थ्व स्वया न्ह्यः सन् २०२३ य् कोलकाताय् जूगु कासाय् दक्षिण अफ्रिकां घरेलु टिम भारतलिसे २४३ रनय् पराजित जूगु खः। थ्व अष्ट्रेलियाया निगूगु तःधंगु एकदिवसीय त्यागु खः। थ्व स्वया न्ह्यः सन् २०२३ य् अष्ट्रेलियां दिल्लीइ जूगु कासाय् नेदरल्यान्डयात ३०९ रनं बुकूगु खः।

अष्ट्रेलियां बिउगु ४३२ रनया लक्ष्ययात लिउने लाकाः दक्षिण अफ्रिकां २४ ओभरय् ५ बलय् १५५ रन दयेकाः फुक्क विकेट गुमेयाःगु खः। दक्षिण अफ्रिकाया डेवाल्ड ब्रुविसं दकलय् अप्वः ४९ रन दयेकूगु खः। अष्ट्रेलियाया कूपर कोनोलीं ६ ओभरय् ५ विकेट कयाः २२ रन बिउगु खः।

कूपर छगू एकदिवसीय कासाय् ५ विकेट काःम्ह दकलय् ल्याय् म्हम्ह अष्ट्रेलियाली जूगु दु। एकदिवसीय कासाय् अष्ट्रेलियाली स्पिनरया थ्व उत्कृष्ट प्रदर्शन नं खः।थ्व स्वया न्ह्यः म्याकाय् टस त्याकाः ब्याटिङ याःगु अष्ट्रेलियां ५० ओभरय् २ विकेटय् ४३१ रन दयेकूगु खः। एकदिवसीय क्रिकेटय् अष्ट्रेलियां याःगु थ्व निगूगु दकलय् अप्वः रन खः।

थ्वसिबें न्ह्यः सन् २००६ य् जोहानसबर्गय् जूगु दक्षिण अफ्रिका विरुद्ध जूगु छगू हे कासाय् अष्ट्रेलियां ४३४ रन दयेकूगु खः। अष्ट्रेलियाया ट्रभिस हेड, कप्तान मिचेल मार्श व क्यामरुन ग्रीनं शतक व एलेक्स क्यारीं अर्धशतक याःगु खः।

दक्षिण अफ्रिकाया केशव महाराज व सेनुरान मुथुस्वामीं १–१ विकेट काःगु खः।दक्षिण अफ्रिकां स्वंगू कासाया एकदिवसीय सिरिज त्याके धुंकूगु दु । न्हापांगु कासाय् दक्षिण अफ्रिकां ९८ व निगूगु कासाय् ८४ रनं त्याकूगु खः।

Categorized in कासा