नेपाल पत्रकार महासङ्घं अनलाइन सञ्चारमाध्यम दर्ता व नवीकरणया ज्या थत्थें चायेकेत  सरकारयात ७२ गू घौया अल्टिमेटम ब्यूगु दु।

महासङ्घया नायः निर्मला शर्मा नेतृत्वया प्रतिनिधि मण्डलं सञ्चार नापं सूचना प्रविधिमन्त्री पृथ्वीसुब्बा गुरुङयात ज्ञापनपत्र लःल्हासें उगु अल्टिमेटम ब्यूगु खः। महासङ्घया महासचिव रामप्रसाद दाहालं ल्हाःचिं तयादीगु ज्ञापन पत्रय् अवरूद्ध दर्ता, नवीकरण सुरू मयासा महासङ्घ आन्दोलनय् वनीगु धयातःगु खः।

ज्ञापनपत्र लःल्हानाकायादिसें मन्त्री गुरूङं अनलाइन सञ्चारमाध्यमतय्त जूगु असहजता अन्त्य यायेत सङ्क्रमणकालीन व्यवस्था यायेगु व थत्थें न्हूगु नियमावली नं हयेगु आश्वासन बियादिल। मन्त्रालयया सचिव राधिका अर्यालं सञ्चारमाध्यम दर्ता व नवीकरण सहज जुइकेगु कुतः याये धकाः धयादिल।

छापाखाना नापं प्रकाशन सम्बन्धी ऐन, २०४८ संशोधन यानाः अनलाइन सञ्चारमाध्यम दर्ता व नवीकरण स्थानीय प्रशासनय् यायेगु व्यवस्था वये धुंकाः देय् न्यंकं अनलाइन सञ्चारमाध्यमया दर्ता, नवीकरण व सञ्चालन अवरुद्ध जुयाच्वंगु खः।

Categorized in राष्ट्रिय