सञ्चार नापं सूचना प्रविधिमन्त्री पृथ्वीसुब्बा गुरुङं समानुपातिक समावेशी निर्वाचन प्रणालीइ जनमत सिर्जना यायेमाःगु ई वःगु धयादीगु दु।

आदिवासी जनजाति उत्थान राष्ट्रिय प्रतिष्ठानपाखें थौं ग्वसाः ग्वःगु सफू लोकार्पण समारोहयात संबोधन यानादिसें मन्त्री गुरुङं समानुपातिक समावेशी निर्वाचन प्रणाली लिकाल धाःसा संविधानया मूल मर्म हे मदइगु जूगुलिं थुकिया पक्षय् जनमत सिर्जना यायेमाःगुलिइ बः बियादिल।नेपाल सरकारया प्रवक्ता सुचना मन्त्री गुरुङया कथं लिपांगु इलय् समावेशी व समानुतापतिक प्रणालीयात नेतातय्सं हे कमजोर यायेत सनाच्वंगुलिं उकियात बचेयात सम्बद्ध पक्ष छधी जुइमाःगु धयादिल।

“गुलिखे नेतातय्सं राजनीतिक स्थायित्व मजूगुलिइ समावेशी प्रणाली पंगः जुया च्वंगु खः धइगु थुइकाच्वंगु दु”, वय्कलं धयादिल, “गुगु तर्क सङ्गत मजू। स्थिर सरकारया बाधक समावेशी पक्ष मखु, बरु नेतातय् कार्यशैलीइ सुधार हयेमाःगु आवश्यक जू।” ताः ई तक जूगु सङ्र्घष व त्यागलिपा मुलुकय् सङ्घीय शासन प्रणाली वःगु न्ह्यथनादिसें सरकार निर्माणया झ्वलय् अझ नं समावेशी प्रणाली लागू जुइ मफूगु वय्कलं धयादिल।

आदिवासी जनजाति ् ‘मुभमेन्ट’ सामाजिक व सांस्कृतिक ख्यलय् जक हे केन्द्रित जूगु कनादिसें वय्कलं आः राजनीतिक व आर्थिक ज्याखँय् नं बः बिइमाःगु धारणा तयादिल। मन्त्री गुरुङं सङ्घीयता वयेधुंकाः सीमान्तकृत समुदायं छु गजाःगु उपलब्धि यात धइगु विषयय् तथ्य तथ्याङ्कलिसें अध्ययन यायेत सुझाव बियादिल।

ज्याझ्वलय् प्रतिष्ठानया न्वकू रेशम गुरुङं आदिवासी जनजातिया विषयय् राज्य संवेदनशील मजूगु गुनासो यानादिसें आदिवासी, जनजातितय् हकअधिकार सुरक्षित नापं सुनिश्चित यायेत आवश्यक अध्ययन, अनुसन्धान, सहलह, पैरवी यानाः अझ प्रभावकारी व सुदृढ संस्थाया विकास यायेत फक्व कुतः जुयाच्वंगु जानकारी बियादिल।

आदिवासी जनजाति विषयलिसे सम्बन्धित थी थी सफू पितब्वःगु उगु ज्याझ्वलय् प्राडा कृष्ण हाछेंथु, प्राडा योगेन्द्र गुरुङलिसेंपिंसं आदिवासी जनजातितय् अवस्था व म्हसीकाबारे विश्लेषणात्मक बिचाः तयादीगु खः।

Categorized in राष्ट्रिय