श्रीघः बहाः धका म्हसिका वयाच्वंगु श्रीशान्तिघट बज्रधातु महाविहार संरक्षण समितिया शनिवाः जूगु तःमुन्ज्यां शुभकाजी शाक्ययात हे हाकनं छक्वः नायः कथं ल्यःगु दु।

मदन शाक्यया कजिसुइ निस्वंगु निवार्चन समितिया कुतलय् जूगु ल्यः ज्याय् सर्वसम्मत कथं न्हूगु ज्यासना पुचःया ल्यःज्या जूगु खः। उगु ल्यः ज्यां कमल शाक्ययात उपाध्यक्ष पुरण शाक्ययात सचिव, अनिल शाक्य सहसचिव, रविन्द्र शाक्य कोषाध्यक्ष, सुरेश शाक्य सहकोषाध्यक्ष कथं ल्यःगु खः।

अथेहे दुजलय् सुरेशकाजी शाक्य, रसना शाक्य, अष्ट रत्न शाक्ययात नं सर्वसम्मत कथं ल्यःगु खः। अथेहेतुं नायःपाखें मनोनित कथं प्रतिभा शाक्य व राजेश शाक्य यात ज्यासना पुचःया दुजः कथं ल्यःगु खः। ल्यःज्या जुइ न्ह्यः समितिया गुक्वःगु दँमुन्ज्या नं जुल।

समितिया नायः शुभकाजी शाक्यया सभानायसुइ जूगु उगु ज्याझ्वलय् समितिया उपाध्यक्ष कमल शाक्यं लसकुस न्वचु तयादिलसा  सचिव पुरन शाक्यं वार्षिक प्रतिवेदन व कोषाध्यक्ष रविन्द्र शाक्यं आर्थिक प्रतिवेदन न्ह्यब्वया दिल। उगु ज्याझ्वलय् श्रीघःया शाक्य परिवारया एसइइ ताःलापिं मस्त अनुभा शाक्य,, अमन शाक्य व दिक्षिता शाक्ययात भिन्तुना देछासे हंगु खः।

Categorized in राष्ट्रिय