प्रधानमन्त्री केपी शर्मा ओली व समाजवादी गणतन्त्र भियतनामया प्रधानमन्त्री फाम मिन चिङ चीनया थियानजिनय् नापलानादीगु दु।

शाङ्घाई सहयोग सङ्कठन (एससिओ) या शिखर सम्मेलनय् ब्वति कायेगु झ्वलय् झायाच्वनादीपिं निम्हं प्रधानमन्त्रीपिं थौं नापलानादीगु खः। नापलायेगु झ्वलय् निगू देय् दथुया सांस्कृतिक, कूतनीतिक व आर्थिक स्वापू व मंकाः ज्याया थीथी पक्षय् सहलह जूगु परराष्ट्र मन्त्रालयं धाःगु दु।

प्रधानमन्त्री चिङं उपराष्ट्रपति भो थि आन सुआनया नकतिनि जक जूगु नेपाः भ्रमणयात लुमंकादिसें प्रधानमन्त्री ओलीयात भियतनाम भ्रमणया निंतिं ब्वनादिल। प्रधानमन्त्री ओलीं भियतनामया स्वतन्त्रताया ल्वापुइ नेपाःपाखें ऐक्यबद्धता प्वंकादिसें चिहाकःगु ई दथुइ उगु देय् नं याःगु प्रगति सकसिया निंतिं हःपाः जूगु धयादिल।

प्रधानमन्त्री ओलीं नेपाल आः वइगु दँय् विकासशील देसय् स्तरोन्नति जुइगु धयादिसें माक्वं लिच्वः बिइगु ऊर्जा क्षेत्रय् लगानी यायेत इनाप यानादिल। वय्कलं थः समकक्षी चिङयात नेपाः भ्रमणया निंतिं ब्वना नापं दीगु दु।

उगु इलय् भ्रमण दलय् ब्वति कयाच्वनादीपिं मन्त्रीपिं, सांसद्पिं व परराष्ट्र मन्त्रालयया उच्च अधिकारीपिनिया नं उपस्थिति दूगु खः।

Categorized in राष्ट्रिय