प्रधानमन्त्री केपी शर्मा ओली चीनया राष्ट्रपति सी चिनफिङ व वय्कःया तिरि मय्जु पेङ लियुआनपाखें शाङ्घाई सहयोग सङ्कठन (एससिओ)या शिखर सम्मेलनय् ब्वति काःगु देय् तय्गु निंतिं ग्वसाः ग्वगु लसकुस समारोहय् ब्वति कयादीगु दु।

चीनया थियानजिन मेइजियान सम्मेलन केन्द्रय् ग्वसाः ग्वगु सांस्कृतिक न्ह्यब्वयालिसेंया बेलि भ्वजय् प्रधानमन्त्री ओलीलिसें न्हापांम्ह मिसा राधिका शाक्य व नेपाःया प्रतिनिधिमण्डलया उच्च पदाधिकारीपिंसं नं ब्वति काःगु दु।

राष्ट्रपति सीया ब्वनाय् प्रतिनिधिमण्डलया नेतृत्व यानादिसें प्रधानमन्त्री ओली थ्वहे भदौ १४ गतेनिसें न्यान्हु यंकंया चीन भ्रमणय् झाया च्वनादीगु दु। भ्रमणया न्हापांगु दिं प्रधानमन्त्री ओली व राष्ट्रपति सी दथुइ निगूपक्षीय नापलायेगु ज्या जुइ धुंकूगु दु।

सोमवाः (भदौ १६ गते) न्ह्याइगु शिखर सम्मेलनय् प्रधानमन्त्री ओलीं सम्बोधन याइगु ज्याझ्वः दु।

Categorized in राष्ट्रिय