शाङ्घाइ सहयोग सङ्गठन (एससिओ) प्लसया शिखर सम्मेलनया निंतिं चीनया थियानजिनय् झायाच्वनादीम्ह प्रधानमन्त्री केपी शर्मा ओली व रुसी महासङ्घया राष्ट्रपति भ्लादिमीर पुटिन दथुइ म्हिगः खँल्हाबल्हा जूगु दु।

 

निम्ह दथुइ थियानजिनया होटेल रिट्ज कार्लटोनय् दकसिबे न्हापा सञ्चारकःमितय् न्ह्यने छुं ई खँल्हाबल्हा जूगु खः। उकिया लिपा बाघौं वय्कःपिं दथुइ याकः याकःचा च्वनाः खँल्हाबल्हा जूगु खः। खँल्हाबल्हा लिपा नेपाःया प्रतिनिधिमण्डलय् दुथ्यापिं दुजःपिं नाप नं राष्ट्रपति पुटिनं नापलानादीगु खः।

नेपाः व रुस दथुया स्वापू तत्कालीन सोभियत सङ्घ जूबले सन् १९५६ जुन ५ निसें जुलाई ९ तारिख तक पलिस्था जूगु लुमंकादिसें राष्ट्रपति पुटिनं नेपाः व रुस दथुया स्वापूतिइ छुं कथंया समस्या मदूगु धयादिल। प्रधानमन्त्री ओलीं लिमलाःगु ज्या धलः दथुइ नं नेपाःयात ई बियादीगुलिं राष्ट्रपति पुटिनयात सुभाय् देछानादिसें थःथवंय् स्वापूयात अझं तब्याका यंकेत इनाप यानादिल।

वय्कलं रुसय् ब्वनाः लिहां वःपिंपाखें चिकित्सा ख्यः नापनापं नेपाःया थीथी ख्यलय् सेवा बिया वयाच्वंगु न्ह्यथनादिसें रुसया शैक्षिक अवस्था गुणस्तरीय जूगु धकाः च्वछानादिल। वय्कःपिं दथुइ उच्चस्तरीय भ्रमणया कालबिल व शैक्षिक, सांस्कृतिक, पर्यटकीय, सुचं प्रविधि, लगानीलिसेंया ख्यलय् मंकाःज्या तब्याकेगु सम्बन्धय् सहलह जूगु दु। थ्वसिबें न्ह्यः प्रधानमन्त्री ओली व चीनया राष्ट्रपति सी चीनफिङलिसें थीथी देय्या राष्ट्र प्रमुख नापं सरकार प्रमुखनाप नापलायेज्या जूगु खः।