औपचारिक भ्रमणय् झायाच्वनादीम्ह प्रधानमन्त्री केपी शर्मा ओली व चिनियाँ उपराष्ट्रपति हान चङ्गदथुइ निगूपक्षीय खँल्हाबल्हा जूगु दु।

बेइजिङया सरकारी पाहाँछेँ देउथाई स्टेट गेष्टहाउसय् थौं नाप लायेगु झ्वलय् वय्कःपिं दथुइ निगूपक्षीय थवंथः हितया थी थी विषय खँल्हाबल्हा जूगु परराष्ट्र मन्त्रालयं धाःगु दु। नापलायेगु झ्वलय् चिनियाँ पक्षं निगूपक्षीय कूटनीतिक सम्बन्ध तब्याकेगु लिसें निगुलिं देय्यात लाभ जुइगु आयोजना न्ह्याकेगु विषयय् सहलह याःगु खः। अथे हे नेपाःया पक्षं औपचारिक भ्रमणया निंतिं ब्वना ब्यूगुलिं व उच्चस्तरीय खँल्हाबल्हाया निंतिं चीन सरकारयात आभार प्वंकूगु खः।

प्रधानमन्त्री ओलीं शाङ्घाई सहयोग सङ्गठन (एससिओ) बैठक उपलब्धिमूलक जूगु धारणा प्वंकादिल।नाप लायेगु झ्वलय् नेपाःया पक्षं छगू चीन नीतिप्रति स्पष्ट दूगु दोहोरे यानाः चीनयाविरुद्ध थःगु भूमि छ्यलेमबीगु प्रतिबद्धता प्वंकूगु खः। थौं हे उपराष्ट्रपति हानं नेपाःया प्रतिनिधिमण्डलया लसकुसय् बहनी भ्वय् ग्वसाः ग्वयादीगु खः।

थियानजिन सहरय् ग्वसाःग्वःगु शाङ्घाई सहयोग सङ्गठन (एससिओ) प्लसया शिखर सम्मेलन क्वचायेधुंकाः प्रधानमन्त्री ओली थौं हे बेइजिङ झायादीगु खः।

Categorized in राष्ट्रिय