राष्ट्रपति रामचन्द्र पौडेलं राष्ट्रिय बाल दिवसया लसताय् सकल नेपाःमि मस्तय्त लिसें हामापिंत भिंतुना देछानादीगु दु। नेपालं बाल अधिकार सम्बन्धी महासन्धी अनुमोदन याःगु दिंयात लिधंसा कयाः दँय् दसं भदौ २९ गते राष्ट्रिय बाल दिवस हनाः वयाच्वंगु दु।

थुगुसिइया बालदिवसया नारा ‘बालबालिकामा लगानी ः सुनिश्चित भविष्यको थालनी’ तयातःगु दु। राष्ट्रपति पौडेलं सन्देशय् बाल दिवसं मस्तय्गु निंतिं शिक्षा, स्वास्थ्य, सुरक्षा लिसें विकासय् ध्यान तसें माःगु लगानीया सुनिश्चितता बिइगु अपेक्षा यानागु धयादीगु दु।सन्देशय् धयातःगु दु, “नेपाःया संविधानं मौलिक हकया कथं मस्तय्गु हकयात सुनिश्चित याःगु दु ।

मस्तय्गु सम्बन्धय् व्यवस्था यानातःगु राष्ट्रिय व अन्तरराष्ट्रिय प्रतिबद्धता लिसें संवैधानिक कानुनी प्रावधानपिनिगु प्रभावकारी कार्यान्वयन यायेत सरकारी लिसें गैरसरकारी निकाय, नागरिक समाज, हामा, ब्वनेकुथि लिसें मेमेगु सरोकारवाला निकायपिनिगु एकीकृत व समन्वायत्मक भूमिका आवश्यक जुइ ।

मस्तय्गु हितयात न्ह्यपलाखय् तयाः समाज व राज्ययात सचेत रुपं कार्यसम्पादन यायेत थ्व दिवसं हःपाः बिइ धइगु विश्वास याये फइ।”वय्कलं अझं नं गुलिखे मस्त थःगु अधिकारपाखें तापाना च्वंगु न्यने दु, अथे जुयाः थीथी हुनिं मस्तय्त लाःवनीगु लिच्वःपाखे सकसिया ध्यान वनेमाःगु दु धयादिसें मस्तय्त जइगु फुक्कं कथंया अमानवीय व्यवहार, हिंसा लिसें दुव्र्यवहार पनेगु सम्बन्धित सरोकारवालापिनिगु दायित्व खः धयादिल।

सन्देशय् धयातःगु दु, “मस्तय्गु भविष्य सुनिश्चित यायेत सृजनात्मक, व्यावहारिक, निःशुल्क व गुणस्तरीय शिक्षाया व्यवस्था, पोषणयुक्त नसात्वँसा, सुरक्षित त्वनेगु लः व सुचुकुचु, माःगु खोप लिसें बालमैत्री स्वास्थ्य संस्था नापनापं नीतिगत, कानुनी व बालमैत्री कार्यसम्पादनया प्रबन्ध यायेमाःगु जुइ।

मस्तय्त छेँ, ब्वनेकुथि व समुदायय् सुरक्षित वातावरण सृजना यानाः सकलें पुचः व समुदायया मस्तय्त समन्यायिक ह्वःताः चूलाकेत थ्व दिवसं ग्वाहालि याइ धइगु अपेक्षा यानाच्वना।”मस्तय्गु संरक्षण, विकास व ब्वतिया निंतिं थःथःगु थासं भूमिका म्हितेत सम्बद्ध सकलें पक्षया ध्यान सालाकाइ धइगु विश्वासं थ्व दिवसं मस्तय्गु सर्वाङ्गीण विकासया निंतिं सम्बद्ध सकसितं थप हःपाः दयेमा धकाः राष्ट्रपति पौडेलं मनंतुनादीगु दु।

Categorized in राष्ट्रिय