प्रधानमन्त्री सुशिला कार्कीया सरकारय् स्वनिगःया प्रतिनिधित्व जुइगु कथं सुं हे नेवाः मन्त्री नियुक्ति मयाःगु खँय् नेवाः समुदायं चिउताः प्वंकाहःगु दु।

थ्व झ्वलय् वर्तमान सरकारय् च्वनेत उपयुक्त कथं सम्पदा अभियन्ता गणपतिलाल श्रेष्ठया नां चर्चाय् वःगु दु । ताः ई न्ह्यवंनिसें सम्पदा संरक्षणया अभियानय् सक्रिय जुया च्वनादीम्ह श्रेष्ठयात संस्कृति मन्त्रालयया जिम्मा बीमाःगुलि सम्पदा अभियन्ता तय्सं हे सः थ्वयेका हःगु दु ।संस्कृति सम्पदा संरक्षणय् अनुभवी व्यक्तिया कथं गणपतिलाल श्रेष्ठया सम्भावना नं अप्वया वनाच्वंगु दु।

उकथं हे मेम्ह सम्पदा अभियन्ता यादवलाल कायस्थं नं संस्कृति मन्त्रीया रुपय् गणपतिलाल श्रेष्ठयात नियुक्ति यायेगु पाय्छि जुइगु बिचाः तयादीगु दु । सामाजिक सञ्जालय् थःगु धापू पोष्ट यासें वय्कलं थ्व खँ धयादीगु खः।

छु न्ह्यः ‘अनलाइन खबर’ पाखें नकतिनि सार्वजनिक याःगु ‘पीदँ क्वय्यापिं पीम्ह सशक्त व्यक्तित्व’ पिनि धलखय् नं समावेश जूम्ह श्रेष्ठ वंगु जेन जी आन्दालनयात नं सक्रिय रुपं ग्वाहालि यानादीम्ह खः।

Categorized in राष्ट्रिय